Ч.Маралмаагийн өмгөөлөгч: Манай үйлчлүүлэгч зорчих эрхээ хязгаарлуулсан нь хөнгөн ял биш

Долоон автомашин мөргөж, хүүхэд дайрч гэмтээсэн иргэн Ч.Маралмаад холбогдох хэргийн шүүх хурал өнөөдөр /2023.03.06/ боллоо.

Анхан шатны шүүхийн шийдвэрийн холбоотойгоор Ч.Маралмаагийн өмгөөлөгч өгсөн яриандаа "Шүүхээс Ч.Маралмаад холбогдох хэргийг гэмт буруугийн шүүх хуралдаанд шилжүүлсэн үеэс эхлэн би өмгөөлөгчөөр нь ажилласан. Өмнөх өмгөөлөгч нь татгалзсан байдаг. Өнөөдөр хоёр шатны шүүх хуралдаан боллоо. Шүүхийн шийдвэрээс  эрүүгийн тусгай ангийн 20.17-р зүйлийн 2.2, 2.4 дэх хэсэгт зааснаар тээврийн хэрэгсэл жолоодох эрхгүй замын хөдөлгөөнд оролцож, бусдад их хэмжээний хохирол учруулсан, хүний эрүүл мэндэд хүндэвтэр хохирол учруулсан гэмт хэрэгт гэм буруутайг тооцож тээврийн хэрэгсэл жолоодох эрхийг гурван жилээр хасах, зорчих эрхийг хоёр жилээр хязгаарлах шийтгэл ногдуулсан. 

Ч.Маралмаа жолоодох эрхгүй байсан, гэсэн хуульд зааснаар жолоодох эрхийг хасдаг учраас эрхийг нь  гурван жилээр хаслаа. Мөн Хан-Уул дүүргийн нутаг дэвсгэрээс гарахыг хориглсон буюу зорчих эрхийг хоёр жилээр хязгаарлах шийтгэл ногдууллаа. Зорчих эрхээ хоёр жилээр хязгаарлах нь тийм ч хөнгөн ял биш. 

Ч.Маралмаа хар тамхи татсан байсан гэдэг нь худлаа мэдээлэл, энэ нь ч нотлогдсон. Мөн тухайн үед согтуу байгаагүй. Ч.Маралмаагийн хувьд гэм буруугаа хүлээн зөвшөөрч байгаа. Тухайн үйлдлийг хийснийхээ дараа өөрөө Цагдаагийн байгууллагад мэдэгдсэн байдаг" гэлээ.