О.Цэрэнпунцаг: Охины гэмтлийн зэрэг тогтоогдоогүй тул хохирогчоор үзэх боломжгүй гэсэн

Долоон автомашин мөргөж, хүүхэд дайрч гэмтээсэн иргэн Ч.Маралмаад холбогдох хэргийн шүүх хурал өнөөдөр /2023.03.06/ боллоо. Анхан шатны шүүхээс түүнд тээврийн хэрэгсэл жолоодох эрхийг гурван жилээр хасах, хоёр жил зорчих эрхийг хязгаарлав. 

 Шүүхийн шийдвэртэй холбоотойгоор хохирогч хоёр охины өмгөөлөгч О.Цэрэнпунцаг  "Манай үйлчлүүлэгч шүүхийн шатанд хохирогчоор оролцоод явж байсан. Шүүх дээр өөрчлөгдөөд хуульд заасан шүүх эмнэлгийн шинжээчийн дүгнэлтээр гэмтлийн зэрэг тогтоогдоогүй байна. Тиймээс хохирогчоор үзэх боломжгүй гэж үзсэн. Өмгөөлөгчийн хувьд тухайн би нэхэмжлэгчийн хүсэлтээ гаргасан. Хуульдаа нэхэмжлэгч нь нэхэмжлэлтэй холбоотой хүрээнд оролцох хэмжээ хязгаартай. Охины хувьд сэтгэл засалчийн эмчийн тодорхойлолтоор ослын дараах эмгэг өөрчлөлттэй гэсэн. Шинжээчийн дүгнэлтээр миний үйлчлүүлэгчид сэтгэцтэй холбоотой гэмтлийн зэрэг тогтоогдохгүй гэсэн байна. Хавтаст хэргийн материал дээр дахин шинжээч томилно уу гэсэн хүсэлт гаргасан боловч шүүх хүлээж аваагүй Тухайн үед захирамжаар шийдэж байгаа учраас гомдол гаргах эрхгүй байгаа юм. Ингэснээр манай үйлчлүүлэгчийн эрх зүйн байдал нь  дордож байна гэсэн үг. Өөрөөр хэлбэл,үндсэндээ хохирогч биш гэмт хэргийн улмаас учирсан иргэний нэхэмжлэгчээр тогтоогдсон. Нотлох баримтыг үнэлж дүгнээд шүүх хуралдааны завсарлагын үеэр 2,630,000 орчим төгрөгийн хохирлыг барагдуулж авсан" гэсэн тайлбарыг өглөө.