"Хөх сувд" мөсний баярт оролцогчдын автомашиныг нуурын мөс рүү оруулаагүй

"Олон нийтийн сүлжээнд явж буй ”ХӨХ СУВД” мөсний баярт Хөвсгөл нуурын мөсөн дээр автомашин зогсоосон, машины түлш урссан, нуур бохирдуулж буй мэдээлэл ХУДАЛ бөгөөд цаашид ийм худал мэдээлэл тараахгүй байхыг хүсье" хэмээн БОАЖЯ-аас залруулга мэдээлэл гаргасан байна. 

Байгаль орчин, аялал жуулчлалын сайдын 2023 оны 2 дугаар сарын 28-ны өдрийн 04 дүгээр албан даалгаврын хүрээнд "Хөх сувд-2023" мөсний баярын арга хэмжээнд дараах үйл ажиллагааг хэрэгжүүлэн ажилласан байна. Үүнд:

Хоолны газруудыг Хөвсгөл нуурын эргээс 50 метрээс гадагш, нийтийн бие засах газрын байршлыг 100 метрээс гадагш тогтоон зурвас татаж бүсээс гадагш байршуулжээ.

2023 оныг Монголд Зочлох жил болгон зарласантай холбогдуулан Эрүүл аюулгүй-Цэвэр орчин бүрдүүлэх, усны нөөцийг бохирдож хомстохоос сэргийлэх зорилгоор Хөвсгөлийн улсын тусгай хамгаалалттай газар нутгийн хамгаалалтын захиргаа, Байгаль орчин аялал жуучлалын газар, Аймгийн Засаг даргын тамын газар, Хатгал тосгоны Захирагчийн ажлын албатай хамтран "Хөх сувд-2023" мөсний баярын өдрүүдэд ажилласан 37 аялал жуучлалын бааз, гэр буудлуудын үйл ажиллагаа, нүхэн жорлонгийн судалгааг гаргаж шаардлага хангаагүй газруудад хугацаатай үүрэг даалгавар, зөвлөмж чиглэл өгч өгсөн.

"Хөх сувд- 2023" мөсний баярын арга хэмжээнд оролцогч иргэд олон нийтэд Хөвсгөл нуурыг хайрлан хамгаалах, бохирдуулахгүй байх талаар нөлөөллийн арга хэмжээ зохион байгуулж, тодорхой цэгүүдэд самбар байршуулан гарын авлага зөвлөмж мэдээлэл өгч ажиллалаа.

Мөн байгууллагын танилцуулга, үйл ажиллагааны чиглэлийг таницуулж иргэд олон нийтэд халуун жимсний шүүсээр үйлчиллээ.

Хөвсгөл аймгийн Цагдаагийн газрын албан хаагчидтай хамтран Хөх сувд-2023 мөсний баярын арга хэмжээнд оролцогчдын авто машиныг нуурын мөс рүү оруулахгүй байх, хоолны газруудын урдуур хааж зогсохгүй байх арга хэмжээг авч ажилласан байна. 

Эх сурвалж: БОАЖЯ