Н.Алтанхуяг: Хөгжлийн банкны хэлэлцүүлгийг нээлттэй явуулах хүсэлтээ өгсөн

Сүхбаатар дүүргийн Эрүүгийн хэргийн анхан шатны шүүхэд хянагдаж байгаа “Хөгжлийн банк”-ны гэх 80 хүн, 4 хуулийн этгээдэд холбогдох эрүүгийн хэргийн гэм буруугийн шүүх хуралдааныг өнөөдөр /2023.03.02/ 09.00 цагт Улаанбаатар чуулгын байранд эхэлсэн ч дөрөвдүгээр сарын 17-ны 08:30 цаг хүртэл хойшилсон. 

Уг шүүх хурлыг олон нийтэд нээлттэй явуулж, хэвлэл мэдээллийнхнийг оролцуулна гэж байсан ч хаалттай хэлэлцэх шийдвэр гарсан. 

УИХ-ын Ерөнхий сайд асан Н.Алтанхуяг урьдчилсан хэлэлцүүлгийг нээлттэй явуулах санал гаргасан байна. Тэрбээр "Надтай холбоотой асуудлыг тусад нь авч үзэх хэрэгтэй. Би тогтоолтой холбоотой асуудал ярина. Гэтэл энэ 80-н хэдэн хүнийг толгойлоод байгаа юм шиг ойлголт явагдаад байна. Хувь хүний нууцтай холбоотой асуудал юм бол тэр хэсгийг нь хаачихна биз. Олон нийтэд ил тод нээлттэй л байх хэрэгтэй. Хаалттай юм бүхэн ялзарсан байдаг" гэсэн юм.