​ “Хөгжлийн банк”-д холбогдох эрүүгийн хэргийн урьдчилсан хэлэлцүүлэг 13:30 хүртэл түр завсарлуулав

Өмгөөлөгчдийн зүгээс шүүгчээс татгалзах хүсэлт гаргаснаар Хөгжлийн банкны урьдчилсан хэлэлцүүлэг завсарлага авлаа.

Нийслэлийн Прокурорын газраас “Хөгжлийн банк”-ны хэрэгт холбогдуулан нэр бүхий 80 хүн, 4 хуулийн этгээдэд эрүүгийн хэрэг үүсгэж яллагдагчаар татан яллах дүгнэлт үйлдэж шүүхэд ирүүлсэн эрүүгийн 1741000380228 дугаартай хэргийн шүүхийн урьдчилсан хэлэлцүүлгийн хуралдаан өнөөдөр /2023.02.15/ Нийслэлийн Улаанбаатар чуулга /театр/-ын байранд эхэлсэн.
Хөгжлийн банкны зээлтэй холбоотой уг хэргийн яллагдагч нарт өмгөөллийн үйлчилгээ үзүүлэхээр нийт 107 өмгөөлөгч ажиллаж буй. Хуралдаанд зургаан прокурор бүгд ирсэн ч хуралдааныг хойшлуулах хүсэлтээ нэр бүхий дөрвөн яллагдагчдын өмгөөлөгчид ирүүлснийг хуралдаан даргалагч СБД-ийн шүүгч Ж.Болдбаатар хүлээн авахаас татгалзсан ч өмгөөлөгчдийн зүгээс оролцогдод эрх тэгш хандах, хуралдааныг хуулийн дагуу явуулахыг шаардаж шүүгчээс татгалзах хүсэлт гарган гарын үсэг зурж байна.

Монгол Улсад анх удаа 100-аас дээш оролцогчтой шүүх хурал ийнхүү Хөгжлийн банкны урьдчилсан хэлэлцүүлэг болж байна. Нийт оролцогчдыг багтаах шүүх танхим байхгүй тул ШЕЗ-өөс УБ чуулгын байранд хийх товыг гаргасан. Урьдчилсан хэлэлцүүлгийг хойшлуулах, дэг тодорхой байх, оролцогчдын эрхийг ижил тэгш хангахыг шүүх дийлэнх өмгөөлөгчид илэрхийлж байлаа. Үүнд шүүх танхимд 100 орчим өмгөөлөгч байхад 20 хүрэхгүй өмгөөлөгч ширээний ард сууж, өмгөөллийн үйл ажиллагаа явуулах эрхтэй байна. Гэтэл бүгдэд ижил тэгш боломж алга, түүнчлэн танхим хүйтэн, хуралдааныг хойшлуулах хүсэлт ирүүлсэн хүсэлтийг бүрэн гүйцэт танилцуулаагүй зэрэг шалтгаануудыг хэлж байлаа. Ийнхүү нийт 11 өмгөөлөгч хуралдааныг даргалагч шүүгчээс татгалзах хүсэлтэд гарын үсэг зурж, хуралдаан 13:30 цаг хүртэл завсарлалаа.