Аврагч З.Гүррагчаа: Нуранги доороос эмэгтэйн хашгирах чимээг сонссон чихэндээ маш их баярлаж байна

Манай сурвалжлах группээс мэдээлэл ирүүллээ. 

 БНТУ-д үүрэг гүйцэтгэж байгаа Монгол Улсын эрэн хайх, аврах баг өчигдөр буюу хоёрдугаар сарын 9-ний өдөр нурангиас 5 хүнийг эсэн мэнд гаргаж, эмнэлгийн анхан шатны тусламж үзүүлэн, эрүүл мэндийн байгууллагад хүлээлгэн өглөө.

Энэ үеэр барилгын зоорийн давхарт гацсан 45 настай эмэгтэйн амийг аврахын тулд дөрвөн цагийн турш аврах ажиллагааг явуулсан. Энэхүү аврах ажиллагааг ОБЕГ-ын Үндэсний аврах бригадын аврагч З.Гүррагчаа гардан явуулжээ. Тэрбээр энэ талаар “Хамгийн түрүүнд эмэгтэйн хашгирахыг сонссон чих маань үнэхээр "мундаг" байлаа. Тухайн эмэгтэй дөрвөн өдрийн турш нурсан барилга дор амь аврагдахын төлөө тэмцсэн. Хамгийн сайхан мэдээ нь эмэгтэйн эрүүл мэндийн хэвийн байна. Манай аврах баг Туркуудтэй сайн ойлголцож ажиллалаа" хэмээн ярьсан байна. 

 Үндэсний аврах бригадад тасралтгүй 18 жил ажиллаж буй аврагч З.Гүррагчаа БНТУ руу явахынхаа өмнө "Нэг ч болтугай хүн аварч, тэднийг гэр бүлтэй нь элэг бүтэн байлгахын тулд аврах ажиллагаанд явж байна" хэмээн хэлж байсан бол энэхүү чин зорилгоо гүйцэлдүүлжээ. Тэрбээр анх удаа гадаад улсад аврах ажиллагаанд оролцож байгаа юм.

Түүнчлэн манай улсын баг Хатай мужид аврах үйл ажиллагаа явуулах үеэр хоёр ч удаагийн газар хөдлөлт болжээ. ОБЕГ-ын аврагчид баазаасаа 20-30 км-ийн зайд аврах, эрэн хайх ажиллагаа явуулж байгаа аж.