ЦЕГ: 15 настай охиныг нагац эгч нь хөнөөж, хэргээ нуух зорилгоор худал мэдээлэл тараасан

Ховд аймагт 15 настай охин амиа алдсан хэргийн талаар ЦЕГ-аас мэдээлэл хийлээ. 

Уг мэдээлэлд "2023 оны нэгдүгээр сарын 29-ны өдөр Ховд аймгийн Жаргалант сумын БОЭТ-д толгойдоо оёдол тавиулсан 15 настай хүүхэд эмчлүүлж байгаад нас барсан мэдээлэл бүртгэгдсэн.Тус хэргийг Цагдаагийн байгууллагаас шуурхай шалгах, гэмт хэргийг илрүүлэх зорилгоор ЦЕГ-аас ажлын хэсэг Ховд аймгийн Цагдаагийн газартай хамтран шуурхай ажилласны үр дүнд хэргийг илрүүлж, шалгалтын ажиллагааг явуулж байна. Мөрдөн шалгах ажиллагаагаар амь хохирогч 2023 оны нэгдүгээр сарын 13-ны өдөр толгой тус газраа бусдад цохиулж гэмтэн, эмнэлгийн тусламж үйлчилгээ авч улмаар 2023 оны нэгдүгээр сарын 28-ны өдөр эмнэлэгт хэвтэн эмчлүүлж байхдаа нас барсан. Уг хэргийг амь хохирогчийн гэр бүлийн хамаарал бүхий Ж гэгч нь үйлдсэн болохыг тогтоож, Эрүүгийн хэрэг үүсгэж яллагдагчаар татаж хойшлуулалшгүй 48 цаг баривчлан цагдан хорих, таслан сэргийлэх арга хэмжээ авах саналыг холбогдох байгууллагад хүргүүлсэн.

Цахим орчинд хохирогчийг сургуулийн орчинд дөрвөн сурагч турбогоор цохиж гэмтээсэн гэх мэдээлэл нь шалгалтын явцад тогтоогдоогүй худал мэдээлэл байна.Харин яллагдагч Ж нь үйлдсэн гэмт хэргээ нуун дарагдуулах зорилгоор хажуудаа байсан гэрчтэй үгсэн тохиролцож, хэвлэлийн мэдээллийн хэрэгслийг ашиглан дөрвөн хүүхдэд зодуулж нас барсан гэх худал мэдээлэл өгч мөрдөн байцаах ажиллагаанд санаатайгаар саад учруулсан байна" гэв.