АН: Бид хууль ёсны даргатай болж, нэг талдаа гарлаа

Монгол Улсын дээд шүүхийн нийт шүүгчийн өнөөдрийн хуралдаанаар Ардчилсан намын даргаар Л.Гантөмөрийг бүртгүүлэх тухай өргөдлийг хэлэлцээд, өргөдлийн дагуу улсын бүртгэлд бүртгэх үндэслэлтэй гэж үзжээ. 

Энэ талаар АН-ын төлөөллөөс мэдээлэл хийлээ. Тэд АН өнөөдөр УДШ-д бүртгэгдсэн хууль ёсны даргатай боллоо гэв. АН-ын Үндэсний бодлогын хорооны гишүүн Ч.Өнөрбаяр хэлэхдээ "Өнөөдөр АН-ын гишүүдийн маань элэг нь дэвтэж, магнай нь тэнийсэн баярын өдөр болж байна. Өнөөдрөөс эхлэн АН-ын цоо шинэ хуудас нээгдэж байна. Бид иргэдийнхээ итгэлийг олж авахын төлөө ажиллах болно. АН өөрийнхөө үнэт зүйл, зарчим дээр тууштай гэдгээ харуулах болно. Мөн энд, тэнд бутарсан байгаа гишүүддээ нээлттэй ажиллана. Бүгд бидний нэг хэсэг учраас ад үзэж, цааш нь түлхэхгүй. Цаашдаа АН Монгол хүний эрх чөлөө, шударгаар бизнес эрхэлж байгаа иргэд, ААН-үүдээ тууштай хамгаална" гэлээ. 

АН-ын гишүүн З.Нарантуяа: 

-УДШ Л.Гантөмөрийг АН-ын даргаар бүртгэсэн нь АН-ын Их хурал хуулийн дагуу болсон гэдгийг маргаангүйгээр тогтоолоо. АН  цаашдаа УИХ дахь бүлэгтэйгээ хамтран төрийн хямралыг арилгахын төлөө, төрд нүүрлэсэн хулгайг арилгахын төлөө, ардчиллын үнэ цэнийг уландаа гишгэж байгаа бүх үйл ажиллагаанд сөрөг хүчнийхээ үүргийг гүйцэтгэнэ. Бид АН-аа сэргээхийн төлөө дотоод сонгуулиа хийсэн, энэ зорилтдоо ч хүрлээ. Нэг намын хяналтгүй тогтолцоог халахын төлөө ажиллана. Өнөөдрийг хүртэл тэвчээртэйгээр энэ өдрийг хүлээж байсан АН-ын мянга мянган гишүүддээ баярлалаа" гэв.