Монголын баг гурван хүний амийг аварчээ

 - "Зариг" сайтын сурвалжлах групп БНТУ-аас шуурхай мэдээллийг хүргэж байна-

ОБЕГ-ын дэд дарга, бригадын генерал Б.Ууганбаяраар ахлуулсан  Монгол Улсын баг гамшгийн голомтот Хатая мужаас аврах ажиллагаагаа эхлүүлжээ. Аврах ажиллагааг орон нутгийн цагаар  20:00 цагаас эхлүүлж  02:00 цаг хүртэл ажилласан байна.  Энэ үеэр хоёр хүүхэд, нэг том хүнийг эсэн мэнд аварсан тухай сайхан мэдээ ирүүллээ. Тодруулбал,

• 20:10 цагт хоёр  настай нэг хүүхэд,  
•  21:50 цагт нэг эмэгтэйг
• 22:33 цагт 15 настай хүү гурвыг орон сууцны нурангиас эсэн мэнд гарган авч эмнэлгийн анхны тусламж үзүүлэн улмаар дараагийн шатны эрүүл мэндийн төвд нь хүлээлгэн өгчээ. 

Манай улсын баг өчигдөр Газиантэп хотын нисэх буудалд орон нутгийн цагаар 09.50 буюу Монголын цагаар 13.30 цагт амжилттай газардсан юм.

БНТУ-ыг зорьсон эрэн хайх, аврах багийн 11 гишүүн нь Зэвсэгт хүчний алба хаагчид юм. Тус багийг Зэвсэгт хүчний 350 дугаар ангийн захирагч, хурандаа Ж.Сүх-Очир ахалж, эмнэлгийн талаас Цэргийн төв эмнэлгийн Аврахуйн Анагаах Ухаан эрхэлсэн орлогч дарга, дэд хурандаа Л.Лувсандорж удирдаж буй.