ЦЕГ: Амиа алдсан 15 настай охины хэргийг шалгаж байна

Ховд аймагт саяхан 15 настай охин толгойдоо бэртэл авсны улмаас амь насаа алдсан талаар охины ар гэрийнхэн мэдээлсэн.  Тодруулбал, Ховд аймгийн Политехник коллежийн дөрвөн охин нэгдүгээр сарын 12-нд  охины толгой руу нь турбогоор цохиж, тархийг хагалсан талаар талийгаач охины ар гэрийнхэн ярьсан. Охины хувьд толгойдоо гэмтэл авснаасаа хойш Ховд аймгийн эмнэлэгтээ удаа дараа хандсан ч охинд  эмчилгээ хийж өгөөгүй гэх мэдээлэл бий. Улмаар охин нэгдүгээр сарын 28-ны өдөр ээжтэйгээ хамт дахин эмнэлэгт очиход охины нугаснаас ус авч  удалгүй охин нас барсан талаар ээж нь ярьсан.

Энэхүү хэргийн талаар бид ЦЕГ-ын Хэвлэл мэдээллийн дарга Б.Мөнхбаяраас тодруулахад: "Ховд аймагт 15 настай охин эмнэлгийн тусламж, үйлчилгээ авч байхдаа нас барсан гэх хэргийг Ховд аймгийн цагдаагийн газарт шалгаж байна" гэв.  Мөн охиныг дарамталж, эрүүл мэнд, амь насанд нь халдсан байж болзошгүй гэх дөрвөн охиныг шалгаж байгаа эсэх талаар тодруулахад "Бид прокурорын зөвшөөрөлгүй мэдээлэл өгөх боломжгүй" гэсэн юм.

Боловсрол, Шинжлэх ухааны яамнаас мөн тодруулахад " Тухайн хэрэгт холбогдсон гэх охид болон багш нарт нь хариуцлага тооцох хуулийн боломж бидэнд байхгүй. Цагдаагийн байгууллагын шалгалтыг дуусахыг хүлээх хэрэгтэй байх. Хариуцлага тооцох эрх нь  Ховд аймгийн Засаг даргад бий" гэсэн хариулт өглөө. 

Охиныг удаа дараа эмнэлгийн тусламж авахаар очиход нь тусламж, үйлчилгээг хангалттай үзүүлээгүй вэ гэдгийг Эрүүл мэндийн яамнаас тодруулах гэсэн боловч тайлбар авч чадсангүй. Учир нь  Эрүүл мэндийн яамны  Тусламж, үйлчилгээний газрын дарга нь ажлаасаа гарсан тул мэдээлэл өгөх хүн яаманд алга" гэлээ.