ҮСХ-ны дарга Б.Батдаваа: Зөвлөлдөх санал асуулгад оролцож байгаа иргэдэд 10 мянган төгрөгийн урамшуулал олгосон

Монгол Улсад 2017 оноос “Зөвлөлдөх санал асуулгын тухай” хууль хэрэгжиж, олон улсад хүлээн зөвшөөрөгдсөн зөвлөлдөх ардчиллын дэвшилтэт үзэл онолын дагуу иргэдийн санал бодлыг сонсох үйл ажиллагааг явуулж эхэлсэн.

Энэ хүрээнд улс орны нийгэм, эдийн засгийн тулгамдсан асуудлыг иргэдийн туслалцаатайгаар тодорхойлох, асуудлын эрэмбэ, шийдвэрлэх арга зам, гаргах шийдвэрийн талаар иргэдтэй зөвлөлдөх, үндэсний зөвшилцлийг хангах зорилготой “Зөвлөлдөж шийдье” зөвлөлдөх санал асуулгын нэг дэх шат 2023.01.26-наас орон даяар эхэлсэн. Зөвлөлдөх санал асуулгын тухай хуульд заасны дагуу мэдээлэл цуглуулах, санал асуулгын үр дүнг гаргах, тайлагнах ажлыг Үндэсний статистикийн хороо, тус хорооны аймаг, нийслэл, дүүрэг дэх нэгжүүд хариуцан гүйцэтгэж байгаа ба нэгдүгээр шатны мэдээлэл цуглуулалт 2023 оны 02 дугаар сарын 02-ны өдрийг хүртэл зохион байгуулагдах юм.