Зудын аюулаас болж 2200 хүүхэд хичээлээс завсардах эрсдэлтэй байна

НҮБ-ын Хүүхдийн Сангийн баг цас зудын байдалтай байгаа баруун аймгийн зарим сумдад ажиллаж нөхцөл байдалтай танилцаж газар дээр нь тодорхой дэмжлэг үзүүлжээ. 

Аймаг, орон нутгийн захиргаа, малчид хамтран өвөлжилтийн бэлтгэл хангасан хэдий ч энэ өвөл урьд жилүүдээс илүү хүйтэрсэн, зун ногооны гарц муу гантай байсантай холбоотойгоор өвөлжилт хүндрэхэд нөлөөлсөн тухай малчид ярьж байна.

Зудад өртсөн малчдад эрүүл мэнд болон нийгмийн суурь тусламж үйлчилгээг цаг алдалгүй хүргэхэд машин техник, бензин түлш, эм, өвс тэжээл зайлшгүй хэрэгтэй байна.

Ялангуяа малчдын хүүхдүүдэд дулаан гутал хувцас, эм витамин хэрэгцээтэй байгаагаас гадна зам цасанд хаагдаж алслагдсан бүс нутгийн сурагчид сургуульдаа ирж чадахгүй улмаар хичээл, цэцэрлэгээсээ завсардах эрсдэлтэй буй. Энэ талаар  Хүүхдийн сангийн хүмүүнлэгийн асуудал хариуцсан ахлах зөвлөх Б.Цогтбаатар "Улсын хэмжээнд 11 аймгийн 22 сумын малчид зудтай өвөлжиж байна. Эдгээр таван суманд сургуулийн насны 7000 гаруй хүүхэд байгаагаас 2200 орчим нь зуданд өртсөн малчин өрхийн хүүхдүүд байсан" гэв.