Л.Гантөмөрийг АН-ын даргаар бүртгүүлэх хүсэлтээ УДШ-д хүргүүлэв

Ардчилсан Нам(АН)-ын ҮБХ-ны ээлжит бус хурал энэ сарын 19-ны өдөр болж, намын даргаа сонгосон. 

Тус хуралд 300 гаруй гишүүн оролцсон бөгөөд 293 нь саналын эрхтэй байснаас,

• БСШУ-ны сайд асан Лу.Гантөмөр 152
• Сангийн сайд асан С.Баярцогт 129 
• УИХ-ын гишүүн асан З.Нарантуяа 12 санал тус тус авсан. 

Улмаар Ардчилсан намын даргаар Лу.Гантөмөрийг Их хурлаараа батламжилсан. Тэгвэл өнөөдөр /2023.01.27/ Дээд шүүхэд Л.Гантөмөрийг АН-ын даргаар бүртгүүлэх хүсэлтийг хүргүүллээ. 

Энэ үеэр  АН-ын Ерөнхий нарын бичгийн дарга Ч.Өнөрбаяр "Улсын дээд шүүхээс АН-ыг даргагүй гэдэг тогтоол гаргасан. Энэ тогтоолыг хэрэгжүүлэхийн тулд АН-ын төлөөллийн дээд байгууллага болох ҮБХ-ноос намын даргаа хууль дүрмийн дагуу сонгосон. Одоо хуулийн ямар нэгэн зөрчил байхгүй. Нөгөөтэйгүүр АН-ын шинэ баталсан дүрмийн дагуу ҮБХ хурлаа хийж, намын даргаараа Лу.Гантөмөрийг сонгосон. Хуулийн дагуу бид холбогдох материалаа бүрдүүлж өгч байна" гэлээ. 

С.Эрдэнийн талын АН-ын зүгээс Лу.Гантөмөрийг даргаар сонгосон  Их хурлыг хууль бус хэмээн үзэж, мөн АН-ын даргыг тодруулах сунгааныг зарласан. Өөрөөр хэлбэл, С.Эрдэнийн зохион байгуулж буй АН-ын даргын сонгуульд

1. УИХ-ын гишүүн, УИХ дахь АН-ын бүлгийн дарга, АН-ын ҮБХ-ны дарга Д.Ганбат

2. Ардчилсан намын Үндэсний Бодлогын Хорооны гишүүн Т.Энхсайхан

3. Ардчилсан намын ҮБХ-ны Ёс зүй сахилга хариуцлагын бодлогын хорооны дарга Д.Ганбаяр

4. Ардчилсан намын Ерөнхий нарийн бичгийн дарга Д.Эрдэнэсувд

5. Баянгол дүүргийн Ардчилсан намын дарга, АЗХ-ны тэргүүн, БГД-ийн ИТХ-ны төлөөлөгч Н.Болдбаатар

6. Чингэлтэй дүүргийн Ардчилсан намын дарга, ЧД-ийн ИТХ-ын төлөөлөгч Ж.Сугарсүрэн

7. Ардчилсан намын ҮБХ-ны гишүүн Л.Гүндалай нар нэрээ дэвшүүлжээ.