С.Ганбаатар: МАН нүүрсний хулгайгаа дарахын тулд "аймшигтай" хууль оруулж ирлээ

УИХ дахь АН-ын бүлгээс Олон нийтийн сүлжээнд хүний эрхийг хамгаалах тухай хуулийн төслийн талаар мэдээлэл хийлээ.

УИХ дахь АН-ын бүлгийн дарга  О.Цогтгэрэл "Олон нийтийн сүлжээнд хүний эрхийг хамгаалах тухай гэсэн гоё нэртэй хуулийн төсөл оруулж ирсэн. Үүнд байр сууриа илэрхийлэх шаардлага гарч ирлээ. Учир нь энэ нь хүний үзэл бодлоо илэрхийлэх эрхэд халдсан, хязгаарлалт хийх гэсэн, албан ёсны сошиал хуудсуудыг хаах эрхийг өгөх гэсэн олон зүйлс үүний цаана байна. 

Энэ хууль гарснаар олон нийтийн сүлжээнд харин хүний эрхийг зөрчсөн, дарга нарын эрхийг хамгаалах зорилготой заалтууд олон байна. Энэ хуулийг дэмжихгүй, хаврын чуулган хүртэл ажлын хэсэг гараад ажиллах нь зөв" гэлээ. 

УИХ-ын гишүүн С.Ганбаатар "Монголчуудын амыг барих хууль оруулж ирлээ. МАН-ынхан нүүрсний хулгайг дарахын тулд Монголын ард түмний нийгмийн сүлжээний амыг барих хууль хэлэлцэх гэж байна. Нийгмийн сүлжээ, хэвлэлийн байгууллагуудын амыг барих хууль оруулж, нүүрсний хулгайгаа дарах гэж байна. Хэвлэлийнхэн давалгаалж энэ хуулийг эсэргүүцэх ёстой. Хосоо шувтруулахаасаа эрх баригчид үхтэлээ айж байна. Ардчиллын амин сүнс, эд эс нь мэдээлэл юм. МАН ардчиллаа устгахаар заналхийлж байна. Иргэдийн мэдэх эрх, мэдээлэл авах эрхийг хаасан. Ард иргэдийн мэдээлэл авах эрхийг хаасан "аймшигтай" хууль оруулж ирлээ. Бид өөрсдөөсөө хамаарах бүхнээ хийнэ" гэлээ.