Танилц: Хөгжлийн банкны хэрэгт яллагдагчаар татагдсан өмнөх ба одоогийн улстөрчид

Хөгжлийн банкны зээлийн хэрэгтэй холбоотой 87 хүний хэргийг АТГ-аас шүүхэд шилжүүлснээс улстөрийн хамаарал бүхий 9 хүн байгаа юм. Тодруулбал, УИХ-ын гишүүн Г.Амартүвшин, Х.Ганхуяг, Ё.Баатарбилэг, Ж.Бат-Эрдэнэ, Н.Алтанхуяг нар байна. Мөн Ерөнхийлөгч асан Х.Баттулга тэргүүтэй хүмүүсийн нэрс байгаа юм. Тэдний зарим нь хилийн хоригтой байна.

Ерөнхий сайд асан УИХ-ын гишүүн Н.Алтанхуяг, УИХ-ын гишүүн асан Н.Батбаяр нарыг Эрүүгийн хуулийн 22.1.3-аар үндэслэн шалгаж байгаа бөгөөд Эрдэнэс Монгол, Бэрэн группт олгогдсон зээлийн асуудлаар шалгаж, яллагдагчаар татаж хилийн хориг тавиад байгаа юм.

УИХ-ын гишүүн Г.Амартүвшин нь Хөгжлийн банкны захирлаар ажиллаж байхдаа Х.Ганхуягийн хамаарал бүхий түүний эгч Х.Хашчимэгийн удирддаг, Г.Дамдинямын хувьцаа эзэшдэг “Вертекс Майнинг партнер” ХХК-д 33 тэрбум төгрөгийн зээл олгосон байдаг. Тэгвэл УИХ-ын гишүүн Г.Амартүвшин, Х.Ганхуяг нарыг эрүүгийн хуулийн 22.1 Эрх мэдэл, албан тушаалын байдлаа урвуулан ашиглах зүйл ангид буруутгаж яллагдагчаар татсан бөгөөд тэдэнд хилийн хориг тавиад байгаа юм.