Ш.Адьшаа: ЖДҮ-чид, бизнесмэнүүд, төрөөс олгодог дэмжлэг, боломжоо улстөрчдөд дахин алдахгүй

УИХ-ын гишүүн Ш.Адьшаа Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт өөрчлөлт оруулах тухай хуулийн төсөл санаачлан боловсруулсан юм. 

Учир нь улс төрд нөлөө бүхий этгээдүүд өөрөө болон өөрийн хамаарал бүхий компаниараа төрөөс баталгаа гаргасан аливаа төсөл хөтөлбөр, зээлийг дур зоргоороо авч байхад жинхэнэ ЖДҮ эрхлэгч, бүтээн байгуулалт хийхийг зорьж яваа жирийн иргэд энэ боломжийг ашиглаж, зээл авч чаддаггүй. Энэ хууль бус бусармаг явдлаас үүдэн иргэдийн төрд итгэх итгэл алдарсан. 

Тиймээс энэ асуудлыг хуулиар зохицуулснаар улстөрчид, тэдний хамаарал бүхий хүмүүс улсын мөнгөөр бусармаг, дээрэнгүй байдлыг таслан зогсоож, жинхэнэ ЖДҮ эрхлэгч, бизнесмэнүүд нь боломжоо ашиглаж улсаа хөгжүүлэх цаг нь болсон нөхцөлийг бүрдүүлэх юм. Энэ хуулийн төслийг УИХ-ын чуулганы нэгдсэн хуралдаанаас хэлэлцэх нь зүйтэй гэж 78 хувийн саналаар дэмжлээ.