Бэрэн группийн зээлтэй холбоотойгоор ХҮН-ын Б.Найдалааг яллагдагчаар татжээ

Хөгжлийн банкны найдваргүй зээлдэгчдийн нэг Бэрэн группийн хамаарал бүхий хүмүүсээр Шинэчлэлийн Засгийн газрын тэргүүн асан Н.Алтанхуяг, Эдийн засаг хөгжлийн сайд асан Н.Батбаяр нар шалгагдаж яллагдагчаар татагдаад буй талаар бид өмнө нь мэдээлсэн. Тэгвэл түүний араас ХҮН-ын гишүүн Б.Найдалаа мөн уг зээлтэй холбоотойгоор яллагдагчаар татагджээ.  

Тэрээр 2012-2016 онд буюу Н.Мөнхбат захирлын үед Хөгжлийн банкны ТУЗ-ын бүрэлдэхүүнд ажиллаж байсан юм. Түүнийг эрүүгийн хуулийн 22.1 буюу Эрх мэдэл, албан тушаалын байдлаа урвуулан ашиглах зүйл заалтаар буруутгаж байгаа юм.

Бэрэн групп нь Хөгжлийн банкинд 47 тэрбум төгрөгийн зээлийн эргэн төлөлтийг хийгээгүй бөгөөд уг асуудлаар Хөгжлийн банкны гүйцэтгэх захирал асан Н.Мөнхбат, Б.Батбаяр, Эдийн засгийн хөгжлийн яамны ТНБД, Хөгжлийн банкны ТУЗ-н дарга Б.Шинэбаатар, Хөгжлийн банкны гүйцэтгэх захирлын ажлын албаны дарга асан Д.Дэлгэрсайхан, Хөгжлийн банкны хэлтсийн дарга асан Д.Цогтбаатар, Монголбанкны ерөнхийлөгч Б.Лхагвасүрэн зэрэг нэр бүхий 42 хүнийг яллагдагчаар татаад байгаа юм. Дийлэнхи нь Хөгжлийн банкны тухайн зээлийг олгох үеийн удирдлагын багийн гишүүд байгаа юм.