Б.Баттөмөр: 900 гаруй иргэнээс Ч.Ундрам гишүүнтэй холбоотой гомдол ирсэн, гомдлуудыг хэлэлцэх боломжгүй

Өнгөрөгч 2022 оны арванхоёрдугаар сард УИХ-ын гишүүн Ч.Ундрамын нөхөр Б.Наранцацралт эхнэрээ гэр бүлийн хүчирхийлэл үйлдэгч, гэр бүлээс гадуур харилцаатай хэмээн олон нийтийн сүлжээнд бичиж, улмаар хэд хэдэн бичлэгийг цахим орчинд байршуулсан байдаг. 

Уг асуудалтай холбоотойгоор нийгэмд гишүүнийг бүрэн эрхээсээ татгалзахыг шаардаж буй. Тэгвэл  900 гаруй иргэнээс Ч.Ундрам гишүүнтэй холбоотой гомдол ирсэн ч гомдлуудыг хэлэлцэх боломжгүй гэдгийг УИХ-ын гишүүн Б.Баттөмөр хэлж байна. Ёс зүйн дүрэмд "УИХ-ын гишүүн нь нийт иргэн, улсын ашиг сонирхлыг эрхэмлэх, төрт ёс, түүх соёлынхоо уламжлалыг хүндэтгэн, авлига ашиг сонирхлын зөрчлөөс ангид байхын зэрэгцээ биеэ зөв авч явж, шударга байдлаараа үлгэр дуурайл үзүүлэх ёстой талаар ёс зүйн хэм хэмжээнд заасан. 

УИХ-ын гишүүн ёс зүйн зөрчил гаргавал:

• Сануулга өгөх,
• Уучлал гуйхыг үүрэг болгох,
• Албан тушаалын цалингийн хэмжээг 6 сар хүртэл хугацаагаар 20 хүртэл хувиар бууруулахаар ёс зүйн дүрэмд тусгасан" байдаг ч хуулийн байгууллагаар шалгагдаж буй тохиолдолд давхар хэлэлцэхгүй гэж заасан байдаг аж.