​4680 тээврийн хэрэгсэлд "Эрдэнэс Тавантолгой" ХК "С" зөвшөөрөл олгоно

Монгол Улс болон БНХАУ-ын Засгийн газар хоорондын Авто тээврийн хэлэлцээрийг 2011 онд байгуулсан байдаг. Тус хэлэлцээрийн 3.1-д “…хэлэлцэн тохирогч нэг талын машин хэлэлцэн тохирогч нөгөө талын нутаг дэвсгэрт нэвтрэхдээ хэлэлцэн тохирогч нөгөө талын эрх бүхий байгууллагаас олгох зорчих зөвшөөрөл, онцгой зөвшөөрөл авч нэвтэрнэ” гэж заасан. Уг хэлэлцээрийн хүрээнд БНХАУ-ын талаас Монгол Улсад хүлээлгэн өгсөн зорчих болон онцгой зөвшөөрлийн бичгийг БНХАУ-ын нутаг дэвсгэрт нэвтрэх Монгол Улсын дугаартай тээврийн хэрэгсэл тус бүрд “Автотээврийн үндэсний төв” ТӨҮГ-аас олгосоор ирсэн. Харин энэ оноо эхлэн "Эрдэнэс Тавантолгой" ХК С зөвшөөрлийг олгодог болж байгаа. 

Энэ хүрээнд "Эрдэнэс Тавантолгой" ХК-аас мэдээлэл хийлээ. Энэ жилийн хувьд 7800 тээврийн хэрэгсэлд уг зөвшөөрлийг олгох учиртай. 

Тэгвэл "Эрдэнэс Тавантолгой" ХК 4680 тээврийн хэрэгсэлд "С" зөвшөөрлийг олгоно, харин 2982 тээврийн хэрэгсэл Цагаан хад дээр, 1698 зөвшөөрлийг хил нөхцлөөр буюу биржээр арилжаална гэдгийг хэллээ. 

Хэлэлцээрийг хэрэгжүүлэх яам хоорондын протоколын 2.2-т “С төрлийн зорчих зөвшөөрлийг байнгын ачаа тээвэр хийх тээврийн хэрэгсэлд олгох бөгөөд олгосон өдрөөс эхлэн 90 хоногийн дотор олон удаа хил нэвтрэхэд хүчинтэй байна” гэж заажээ. Энэхүү төрлийн зорчих зөвшөөрлийн бичгийг уул уурхай экспортын тээвэр гүйцэтгэж буй тээврийн хэрэгслүүдэд олгодог билээ.