Л.Оюун-Эрдэнэ: Төрд үүрлэсэн авлигачидтай тэмцэнэ, дараагийн бөмбөг төмөр зам, тээврийн салбарынхны дунд тэсэрнэ шүү

Ерөнхий сайд Л.Оюун-Эрдэнэ шинээр томилогдох сайд нарыг УИХ-д танилцууллаа. 

Үүний дараа УИХ-ын гишүүн Л.Бейсен төрд байгаа хулгайтай илүү сайн тэмцмээр байна. Энэ их хулгай ялангуяа “Нүүрсний хулгай”-н хэргээс харахад цалин нэмэх бүрэн боломж байгаа юм биш үү хэмээн Ерөнхий сайдаас асуулт асуулаа. 

Ерөнхий сайд Л.Оюун-Эрдэнэ "Төрийн алба цомхон бүтэцтэй байх, албан хаагчид цалин хангамж өндөр байх ёстой гэдэгтэй санал нэг байна. Цалинг өндөр болгоно. Төрд үүрлэсэн авлигачидтай тэмцэх ажил цаашид үргэлжилнэ. Хэт өндөр хэрэглээтэй орлогоо нотолж чадахгүй байгаа төрийн албан хаагчидтай тэмцэх цаг болсон. Авлигаар хөрөнгөжсөн төрийн албан хаагчдад хяналт тавина. Нийтэд ч зарлана. Ялангуяа газартай холбоотой асуудлыг ил болгон зарлаж, цахимжуулна. 

Төмөр зам, тээвэр логистиктой холбоотой салбарын дарга нар болгоомжтой байгаарай. Дараагийн бөмбөг тэсэрнэ шүү. Байгаль орчны яамны газрын наймаачид бас болгоомжтой байгаарай. Энэ салбарын авлигачдыг удахгүй илчилнэ, ард нь байгаа улстөрчдийг нэрлэнэ. Монголбанкны газрын дарга нарт хандаж хэлэхэд банк бус санхүүгийн байгууллагаа одоо боль. Ингээд л манай асуудал цэгцэрнэ" гэсэн юм.