Б.Батдаваа: Манай гэрээс олдсон 250 мянган ам доллар хадгаламжийн мөнгө байсан

УИХ-ын харьяа Үндэсний статистикийн хорооны дарга Б.Батдаваагийн гэрээс 250 мянган доллар гарсан, энэ нь нүүрсний хулгайн хэрэгтэй холбоотой эсэх дээр түүнээс байр суурийг нь тодрууллаа. Тэрбээр "Манай эхнэр нүүрс тээврийн компанид ажилладаг нь үнэн. Тухайн үед 20 гаруй компанийг шалгасан. Гэхдээ уг асуудалтай холбоотойгоор манай эхнэрийг болон намайг холбогдуулан шалгасан зүйл байхгүй. 

Гэрт байсан 250 мянган ам доллар буюу өнөөдрийн ханшаар 900 орчим сая төгрөгийг шилжүүлэг хийхээр хадгаламжаасаа аваад байсан юм. Намайг хардах нь зөв. Гэхдээ би уг мөнгө ямар учиртайг тайлбарласан, эх үүсвэр нь тодорхой, хөрөнгө оруулгын мэдүүлэгтээ ч мөн дурдсан байгаа" гэсэн юм. 

Үндэсний статистикийн хорооны даргыг УИХ-ын Эдийн засгийн байнгын хороо болон УИХ-ын чуулганаар томилдог зохицуулалттай.  Энэ зохицуулалтаар Б.Батдаваа 2021 оны нэгдүгээр сард ҮСХ-ны даргаар томилогдсон билээ.