Ш.Адьшаа: Улстөрд нөлөө бүхий этгээд төрөөс баталгаа гаргасан төсөлд зээл авахыг хориглох хуулийн төслийг өргөн барилаа

УИХ-ын гишүүн Ш.Адьшаа нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт өөрчлөлт оруулах тухай хуулийн төсөл өргөн барилаа. Тэрбээр "Энэхүү хуулийн заалтаар улстөрд нөлөө бүхий иргэн өөрөө болон өөрийн хамаарал бүхий компаниараа төрөөс баталгаа гаргасан аливаа төсөл хөтөлбөр, зээл авахыг хориглох юм. Энэ хүмүүс жинхэнэ ЖДҮ эрхлэгч, бүтээн байгуулалт хийхийг зорьж яваа жирийн иргэдийнхээ боломжийг хулгайлдаг байдлыг хуулиар зохицуулахгүй бол иргэд төрд итгэх итгэл үгүй боллоо. Эрх мэдлээ ашиглан “өрмийг” нь хамчихдаг улстөрчид, тэдний хамаарал бүхий хүмүүс улсын мөнгөөр яаж гараа угаадгийг ЖДҮ сангийн зээл, Хөгжлийн банкны үйл явдлаас бэлхэнээ харж болно. Одоо энэ бусармаг, дээрэнгүй байдлыг таслан зогсоож жинхэнэ ЖДҮ эрхлэгч, бизнесмэнүүд нь боломжоо ашиглаж улсаа хөгжүүлэх цаг нь болсон" гэлээ.