Иргэдийн 46,5 хувь нь эрүүл мэндийн салбарт талархал илэрхийлжээ

Эрүүл мэндийн яамнаас сар бүр тогтмол зохион байгуулдаг ээлжит хурлаа өнөөдөр /2022.12.30/ зохион байгууллаа. Тус хуралд Эрүүл мэндийн яамны Төрийн захиргаа удирдлагын газрын дарга П.Эрхэмбаяр, Нийтийн эрүүл мэндийн газрын дарга Д.Баярболд, Эмнэлгийн тусламж, үйлчилгээний газрын дарга Ж.Нарангэрэл, ХӨСҮТ-ийн Ерөнхий захирал Ц.Билэгтсайхан, Эмчилгээ эрхэлсэн дэд захирал Чинбаяр нар оролцож, мэдээлэл өглөө. 

Энэ үеэр Эрүүл мэндийн яамны Төрийн захиргаа удирдлагын газрын дарга П.Эрхэмбаяр Засгийн газрын "Иргэд, олон нийттэй харилцах 11-11 төв"-д иргэдээс ирүүлсэн санал гомдол, талархлыг танилцууллаа.Тэрээр "Засгийн газрын Иргэд, олон нийттэй харилцах 11-11 төвд 2022 оны 12 дугаар сарын 01-30-ны өдрүүдэд нийт 258 иргэн хандаж, эрүүл мэндийн салбартай холбоотой гомдол, санал, хүсэлт, талархлаа илэрхийлсэн бол 228 иргэний өргөдөл, гомдолд хуулийн хугацаанд хариу өгч, өргөдөл гомдлын шийдвэрлэлт 88,4 хувьтай байна. Нийт хандсан иргэдийн 49,6 хувь нь гомдол, 2,6 хувь нь санал, 1,3 хувь нь хүсэлт, 46,5 хувь нь талархал илэрхийлжээ.