“Таван Толгой”-оос нийт иргэдэд олгох хувьцааны хэмжээг нэмэгдүүлэх санал дэвшүүллээ

УИХ-ын Эдийн засгийн байнгын хорооны өнөөдрийн хуралдаанаар 2012 оноос хойш төрсөн хүүхдүүдэд Эрдэнэс Тавантолгойн 1072 хувьцаа олгох асуудлыг хэлэлцлээ.

Өнөөдрийн байдлаар “Эрдэнэс таван толгой” ХК-ийн нийт хувьцааны 18.5 хувийг Монгол Улсын 2.5 сая иргэн эзэмшиж буй. Үүн дээр 2012 оны 4-р сарын 10-наас хойш төрсөн 1 сая орчим хүнд нэмж 8.5 хувийг нь эзэмшүүлэх асуудал яригдаж байна. Ингэж үзвэл тус компанийн 27 хувийг нийт иргэддээ олгоно гэсэн үг.

УИХ-ын Д.Батлут Байнгын хорооны хуралдааны үеэр иргэд баялгийнхаа эзэн болох боломж нь бий болж, тус компанийн засаглал олон нийтийн хяналтад шилжихэд 27 хувь хангалтгүй гэж үзэж буйгаа илэрхийлсэн юм. Тиймээс 27 хувийг нэмэгдүүлж 34-өөс доошгүй хувийг нийт иргэддээ олгох санал дэвшүүлсэн нь УИХ-ын Байнгын хороогоор дэмжигдлээ. 

УИХ-ын гишүүн Д.Батлут энэ талаар ярихдаа “Хэрэв нийт иргэддээ 27 хувийг өмчлүүлбэл төрд 72 хувь нь үлдэх юм. Төрийн эрх томрох тусам тэнд хууль бус үйлдлүүд гарч, засаглалын хямрал үүсэх эрсдэлтэйг бид олон жишээнээс харлаа. 34-өөс доошгүй гэдэг нь дээшээ хэдэн ч хувиар өсөх боломжтой буюу хамгийн оновчтой томьёолол юм” гэлээ.