Д.Батлут: 2012 оноос хойш төрсөн хүүхдүүдэд олгох Тавантолгойн хувьцааны хэмжээг нэмж чадлаа

УИХ-ын Эдийн засгийн байнгын хорооны өнөөдрийн хуралдаанаар 2012 оноос хойш төрсөн хүүхдүүдэд Эрдэнэс Тавантолгойн 1072 хувьцаа олгох асуудлыг хэлэлцлээ.

Уг төслийг боловсруулахдаа 2012 оны 4-р сарын 10-наас хойш төрсөн хүмүүст “Эрдэнэс Таван толгой” компанийн 27 хувийг олгохоор тусгасан байна. Энэ үеэр УИХ-ын гишүүн Д.Батлут санал гаргаж 27 хувийг 34-өөс доошгүй хувь болгон өөрчлөх санал хураалт явуулж, дэмжигдлээ. Ингэснээр 1 сая орчим хүүхэд “Эрдэнэс таван толгойн” хувьцааны 34 хувийн эзэмшигч болох эхний шийдвэр гарлаа. Уг санал нь ийнхүү Байнгын хороогоор дэмжигдсэн бөгөөд УИХ-ын чуулганы нэгдсэн хуралдаанаар хэлэлцэгдэж, эцсийн шийдвэр гарна.

Энэ талаар УИХ-ын гишүүн Д.Батлут ярихдаа “Ингэснээр иргэд баялгийнхаа эзэн болох боломж нь бий болж, тус компанийн засаглал олон нийтийн хяналтад шилжих эхлэл болно гэдэгт эргэлзэхгүй байна. Үүний өмнө тэдэнд 27 хувийг өмчлүүлж, төрд 72 хувь нь үлдэх байв. Төрийн эрх томрох тусам тэнд хууль бус үйлдлүүд гарч, засаглалын хямрал үүсэх эрсдэлтэйг бид олон жишээнээс харлаа. 34-өөс доошгүй гэдэг нь дээшээ хэдэн ч хувиар өсөх боломжтой буюу хамгийн оновчтой томьёолол юм” гэлээ.