"УИХ болон ЗГ-ын гишүүн, дэд сайдын гэр бүлийнхнийг төрийн удирдах албанд томилохгүй, тендерт оролцуулахгүй"

Засгийн газрын хэрэг эрхлэх газрын дарга Д.Амарбаясгалан энэ долоо хоногийн Засгийн газрын хуралдаанаас гаргасан зарим асуудлын талаар мэдээлэл хийлээ.

Тэрбээр "Энэ долоо хоногийн Засгийн газрын хуралдаанаар Ерөнхий сайд үүрэг чиглэл өгсний дагуу  УИХ, Засгийн газрын гишүүд, дэд сайдын албан тушаал хашиж байгаа бол тэдний харилцан хамаарал бүхий этгээдүүд буюу эхнэр, нөхөр, төрсөн ах, дүүс  төрийн захиргааны болон төрийн өмчийн хуулийн этгээдийн газарт удирдах ажил, албан тушаал эрхлэхгүй байх мөн өөрийн эзэмшлийн болон хамаарал бүхий этгээдийн компани нь төрийн тендер, худалдан авах ажиллагаанд ордоггүй байх зохицуулалт хийх үүргийг Ерөнхий сайд өгсөн.  

 Энэ дагуу Хууль зүйн яамнаас холбогдох хуулийн өөрчлөлтийг боловсруулж байна.

1. Нийтийн албанд нийтийн болон хувийн ашиг сонирхлыг зохицуулах Ашиг сонирхлын зөрчлөөс урьдчилан сэргийлэх тухай хуульд нэмэлт өөрчлөлт оруулна,

2. Төрийн албаны тухай хуульд,

3. Төрийн болон орон нутгийн өмчийн тухай хуулиуд нэмэлт өөрчлөлт оруулах замаар дээрх өөрчлөлтүүдийг хийнэ. 

Иргэд олон нийтийн зүгээс төрөөс тодорхой хэдхэн зүйлийг шаардаж байгаа. Хамгийн нэгдүгээрт, шударга, ард түмэнд тэгш боломжийг шаардаж байна"  гэлээ.