Д.Амарбаясгалан: "Эрдэнэс Монгол" компанийн 88 орон тоонд сонгон шалгаруулалт зарлаж байна

Засгийн газрын хэрэг эрхлэх газрын дарга Д.Амарбаясгалан өнөөдөр /2022.12.23/ мэдээлэл хийлээ. 

Тэрбээр "Монголын хөрөнгийн биржийн хувьцаа гаргахтай холбоотой өнгөрсөн оны арванхоёрдугаар сард батлагдсан хууль байгаа. Уг хуулиар ганц хөрөнгийн бирж биш төрийн өмчид бүртгэлтэй 110 мянга гаруй компани бий. Эдгээр байгууллагын 34 хувь буюу хяналтын багцыг эхний ээлжид олон нийтэд шилжүүлнэ. Үүний дараагаар 66 хувь хүртэлх хувьцааг олон нийтэд шилжүүлнэ. 

Төр сайн менежер байж чадахгүй байна гэдэг шүүмжийг маш олон жил ярьж ирсэн. Тиймээс Засгийн газар төрийн өмчит компаниудыг олон нийтийн хяналтад шилжүүлэх ажлыг эхлүүлж байна. Ирэх 2023 онд төрийн өмчийг олон нийтийн хяналтад шилжүүлэх ажлыг эрчимжүүлнэ.

Хоёрдугаарт, “Эрдэнэс Монгол” ХХК байгууллагдаад 15 орчим жил болж байгаа ч өнөөдрийг хүртэл үндсэн үүргээ амжилттай хэрэгжүүлж чадаагүй. Тус компанийн  гүйцэтгэх захирлыг хоёр долоо хоногийн өмнө томилсон. Үүнтэй холбогдуулж тус компани цаашдаа цэвэр менежментийн компани болох ёстой. Энэ үүрэг чиглэлийн дагуу бүтцээ баталсан бөгөөд ажилчдын нээлттэй сонгон шалгаруулна. Нийт 88 албан тушаалтныг нээлттэй сонгон шалгаруулж авна. 

Ерөнхий сайдын өгсөн үүрэг чиглэлийн дагуу УИХ, Засгийн газрын гишүүн, дэд сайд нарын хамаарал бүхий этгээдүүд нь тэднийг төрийн албанд ажиллаж байх хугацаанд төрийн өмчийн болон төрийн захиргааны байгууллагад удирдах албан тушаал хашдаггүй байх. Мөн УИХ, Засгийн газрын гишүүд, дэд сайд нарын өөрийн эзэмшлийн болон хамаарал бүхий этгээдүүдийн компани нь төрийн тендер худалдан авалтын үйл ажиллагаанд ордоггүй байх зохицуулалтыг хийх үүрэг чиглэл өгсний дагуу ажил явагдаж байгаа. “Эрдэнэс Монгол” ХХК-д дарга гэсэн ойлголтуудыг хасч нийт долоон газрыг нь ахлах менежер удирдана.