Х.Алтай: Монголын Хөрөнгийн бирж IPO гаргахад бэлэн болсон

 “Монголын хөрөнгийн бирж” ТӨХК нь нийт гаргасан хувьцааныхаа 34 хувийг олон нийтэд санал болгож олон нийтийн өмчийн оролцоотой компани болоход бэлэн болжээ. 

Төрийн өмчит хуулийн этгээдийг нэмж хувьцаа гаргаж биржээр нээлттэй арилжаалах замаар олон нийтийн хяналтад оруулах, санхүүгийн сахилга бат, засаглалыг сайжруулах, үйл ажиллагааны тогтвортой, ил тод байдлыг хангах зорилгоор УИХ-ын 2022 оны 16 дугаар тогтоолоор “Төрийн өмчит хуулийн этгээдийн хувьцааг 2022-2023 онд биржээр олон нийтэд нээлттэй худалдах үндсэн чиглэл”-ийг баталсан.  Улмаар Засгийн газрын 244 дүгээр тогтоолоор “Төрийн мэдлийн хувьцааг 2022-2023 онд биржээр олон нийтэд нээлттэй худалдах төрийн өмчит хуулийн этгээдийн жагсаалт”-ыг баталсан бөгөөд энэхүү жагсаалтад “Монголын хөрөнгийн бирж” ТӨХК багтсан билээ.

Монголын Хөрөнгийн бирж IPO гаргахад бэлэн болжээ. Үүнтэй холбогдуулан Хөрөнгийн биржийн захирал Х.Алтай мэдээлэл хийлээ. Тэрбээр “Төрийн өмчит компаниудыг түүчээлж, Монголын Хөрөнгийн бирж хувьцаа гаргах Засгийн газрын шийдвэр гарсан. Энэ шийдвэрийн дагуу Хөрөнгийн бирж хувьцаа гаргах бэлтгэл ажлаа хангаж, СЗХ-ноос зөвшөөрлөө авсан. Ирэх Даваа гаригт Монголын хөрөнгийн бирж IPO хийхэд бэлэн болсон. 

Манай IPO хэд хэдэн онцлогтой. Төрийн олон орон нутгийн өмчийн тухай хуулиар нэг этгээд болон түүний харилцан хамаарал бүхий этгээд 5-аас дээш хувийг эзэмших боломжгүй. Мөн улс төрийн нөлөө бүхий албан тушаалтан болон түүний хамаарал бүхий этгээдүүд хувьцаа эзэмших боломжгүй. Тэгэхээр Монголын хөрөнгийн бирж улс төрийн нөлөөнөөс ангид, ямар нэг компани хувьцааг дангаар эзэмших эрсдэлгүй, жинхэнэ утгаараа олон нийтийн хяналтад шилжинэ” гэлээ.