Энжи: Би том болоод Хөгжлийн бэрхшээлтэй хүмүүсийг эмчилдэг эмнэлэгтэй болно

Түүнийг "Авьяаслаг Монголчууд" шоуны бяцхан чоно гэдгээр хүмүүс андахгүй. Гурван настайдаа том тайзан дээр гарч олон хүний хайрыг татсан бяцхан Энжи тасралтгүй уран бүтээл хийсээр байгаа юм. Энжи ухаалаг бас хэрсүү охин. Түүнтэй хэсэгхэн хором ярилцлаа. 

БИ ТОМ БОЛООД ХӨГЖЛИЙН БЭРХШЭЭЛТЭЙ ХҮМҮҮСИЙГ ЭМЧИЛДЭГ ЭМНЭЛЭГТЭЙ БОЛНО

Уран бүтээл нь өндөр байна уу? 

-Өндөр байгаа. Удахгүй шинэ клипээ гаргах гэж байгаа, хоолойгоо бичүүлчихсэн. Тулааны урлагийн клиптэй учраас зөндөө бэлтгэл хийж байгаа.

 Саяхан миний дүү талбай дээр жагсмаар байна гээд лайв хийж байсан. Бас Хөгжлийн бэрхшээлтэй хоёр хүүхдэд тусласан байсан.

-Уг нь манай ах, эгч хоёр талбайн жагсаал дөнгөж эхэлж байхад зузаан куртик, өмд аваад зөндөө юм болсон. Яагаад жагсах гэж байгаа юм бэ гээд асуусан чинь талбай дээр жагсаж чадахгүй хүнд өвдчихсөн хүмүүс их байгаа. Тэр хүмүүсийн өмнөөс жагсах ёстой гэсэн. Тэгэхээр нь би ч гэсэн хамт жагсая гэтэл хүүхэд жагсаж болохгүй ээ гэсэн. Талбайн жагсаал эхлээд хоёр, гурав хоногийн дараа ах маань стори хийчихсэн байсан. Би яг тэр үед тоглолтоо тараад явж байхдаа харсан чинь гадаа хүйтэнд хөгжлийн бэрхшээлтэй хоёр хүүхэд жагсаж байсан. Агаа стори дээрээ "би хөдлөөд байхад л даараад байхад энэ хөдөлгөөнгүй байгаа хүүхдүүдийг яаана аа" гэчихсэн байсан. Тэр сториг хараад, гадаа хүйтэнд жагсаж байгаа хүүхдүүдийг хараад сэтгэл өвдөөд лайв хийсэн. Бас ах, эгч хоёртоо гомдоод үзүүлэх гээд л лайв хийтэл маш олон хүнд хүрсэн байсан. Тэгээд дараа нь тэр хоёр дүүтэйгээ уулзсан. Манай хоёр дүүг Нархан, Эрхэсбаяр гэдэг юм билээ. Алхаж бас ярьж чаддаггүй. Намайг хараад хөөрхөн инээгээд л байсан. Хоёр дүүдээ бэлэг өгье гэж бодож байсан чинь өөрөө ч гэсэн бэлэгтэй болсон.

 Миний дүү өөрөө жагсая гэж бодож байсан юм уу?

 -Тийм, яагаад гэвэл тэр хавиар хүмүүст туслахыг хүссэн бас гишүүдэд гомдоод жагсахыг хүссэн. Хэрвээ тэр их мөнгө байсан бол тэр хүүхдүүд гадаа хүйтэнд жагсахгүй байх байсан. Нэг хүний 125 сая гэхээр их мөнгө шүү дээ. Бараг л өвчтэй хүн гэж байхгүй байх байсан. Тийм болохоор их гомдсон.

 Чиний амьдарч байгаа нийгэм чамд ямар санагддаг вэ, чамд таалагддаг уу?

 -Өмнө нь Монгол улс маань надад их таалагддаг байсан. Сүүлийн үед улстөр ойлгодог болоод ирсэн чинь сонин санагдсан. Тэр мөнгийг авч байхаар улсаа хөгжүүлж, хүмүүст туслахгүй яаж байгаа юм бэ л гэж бодсон. Тэгээд би том болоод хүмүүсийг , хөгжлийн бэрхшээлтэй хүмүүсийг эмчилдэг эмнэлэгтэй болно гэж боддог. 

Хоёр дүүгийнх нь аав ээж юу хэлж байна.

 -Хөөрхөн охин байна, маш их баярлалаа гэсэн. Ээжүүд нь нэг л дулаахан хоёр эгч байсан. Харахаар л гоё санагддаг эгч нар байдаг даа тийм хүмүүс байсан. Супер ээжүүд байна лээ.

 Энжи хүнд өвчнийг даван туулсан. Одоо бие нь хэвийн болсон уу? 

-Би 14 хоног хэвтэрт байхад үнэхээр уйтгартай байсан. Хоёр дүүг харахад тэр мэдрэмж төрөөд дотор эвгүй болсон. Тэгээд уулзаад одоо сэтгэл санаа дээрдсэн. Миний бие хэвийн байгаа.

               ДҮҮДЭЭ ОР АВЧ ӨГӨӨД, ГАНЦ УДАА Ч ГЭСЭН БАЯРЛУУЛЧИХЛАА ДАА ГЭЖ БОДСОН

Энжи саяхан Бооёо дүүдээ ор авч өгсөн байсан. 

-Дүүгийнхээ бас өөрийнхөө дуртай орыг авч өгсөн. Өөрийнхөө мөнгөнд тааруулаад авсан. Өөрийнхөө олсон мөнгөөр дүүгээ баярлуулах гоё санагдсан. Манай Бооёо "Баярлалаа аниа" л гээд байсан. Дүүдээ бас ор авч өгөөд ганц удаа ч гэсэн баярлуулчихлаа даа гэж бодсон. /Уйлав /Гоё, сэтгэгдэл өндөр байсан.

Энжи студитэй болсон юм байна, танилцуулж болох уу? 

-Болно, бүжгийн заал, хөгжмийн өрөө, маркетингийн өрөө гэсэн хоёр ягаан, нэг хөх өнгийн өрөөтэй. Би өөрөө өнгийг нь сонгосон, ягаан өнгөнд маш их дуртай. Энэ студийг тохижуулж өгөхийн тулд нойр, хоолгүй тусалж ийм гоё болгож өгсөн ах, эгч нартаа маш их баярлалаа. 

Ярилцсанд баярлалаа, амжилт хүсье.

Бичлэгээр үзэх: