С.Шаарийбуу: Эцэст нь би ялсан мэт боловч навсайсан нэг амьдрал л үлдлээ

Монгол Улсын иргэн Шаарийбуугийн Алтантуяа 2006 онд Малайз улсад бусдын гарт амь насаа алдсан харамсалтай хэрэг гарсан. Уг хэргийн үнэнийг олж, уучлалт гуйлгуулахын тулд түүний аав С.Шаарийбуу 16 жил явсан билээ. Уг хэрэг эцэслэн шийдэгдэлгүй явсаар энэ оны 12 сарын 16-нд Малайзын шүүхээс Ш.Алтантуяагийн үхэлд улс төр судлаач Абдул Разак Багинда, ахлах байцаагч Азилах Хадри, бага түрүүч Сирул Азхар Умар нарын гурван хүнийг, мөн засгийн газрыг буруутай гэж үзэн нэрсийг зарлаж таван сая ринггит буюу монгол мөнгөөр 3.76 тэрбум орчим төгрөг олгуулахаар болсон билээ.

Талийгаачийн аав С.Шаарийбуу өнөөдөр сэтгүүлчдэд хандаж олон нийтэд мэдээлэл өглөө. Тэрбээр "Охиноо дурсаж нэг минут хүндэтгэл үзүүлье. Миний охин бусдын л адил амьдралын төлөө зүтгэж, өвчтэй байсан хүүхдээ эмчлүүлэхээр харь орныг зорьсон. Надад охиндоо өгөх мөнгө байгаагүй ээ. Хүний нутагт хийгээгүй хэргийнхээ төлөө хоригдож, хүний наймааны золиос болсон олон монгол иргэн бий. Бидэнд тохиолдсон үйл явдлаас болж өнгөрсөн хугацаанд эдгээр хүмүүсийн төлөө ч явсан. 

Энэ хугацаанд би Монголын төрд, Малайзад, хүний эрхийн байгууллагад гээд нийт 300 гаруй өргөдөл бичсэн. Аз болж Малайзын нэртэй хуульч, өмгөөлөгч Карпал Сингхтэй би хувь тохиолоор учирсан. Тэр хүн надад тусалахад бэлэн байна гэхдээ хэрэг 100 жилийн дараа ч шийдэгдэж магадгүй, намайг тэвчээртэй байгаарай" гэж байсан. Харин өнөөдөр бид шударга ёсыг тогтоож чадлаа.

Гэсэн ч энэ 17 жилд өнчирсөн хэдэн хүүхэд, навсайсан амьдрал л үлдлээ" хэмээсэн юм.