Б.Саранчимэг: Уул уурхайн цаад эздийг олон нийтэд ил тод болгох ёстой

УИХ-ын өчигдрийн чуулганаар Эрүүгийн хуулийн 22.1 заалтыг цаг үеийн нөхцөл байдалтай холбогдуулж өөрчлөлт оруулах асуудлыг хэлэлцсэн. 

Энэ үеэр УИХ-ын гишүүн Б.Саранчимэг "Нэгэнт хулгай хийсэн этгээд, албан тушаалтанд хуулийн дагуу хатуу хариуцлага хүлээлгэхийг миний бие дэмжиж байгаа.Гол учир шалтгаан нь уул уурхай тойрсон төрийн өмчит аж ахуйн нэгжүүдтэй холбоотой бүхэн нууц байна. Энэ бүхнийг ил тод болгохыг хуульчлах ёстой.

Хэн нэгэн мэдээлэлтэй хүн шүгэл үлээснээр хууль хүчний байгууллага илрүүлж, шалгаж, хариуцлага тоцуулах бус олон нийтийн хараа хяналтанд оруулж байж зогсооно. Олборлох үйлдвэрлэлийн ил тод байдлын тухай хуулийг бид шинээр гаргаж, яаралтай батлах ёстой. Нэгэнт хулгай гарсны дараа шийтгэх асуудлаас илүүтэй ул үндсээр нь асуудлыг шийдэх цаг нь болсон. Жагсаж байгаа иргэдийн үндсэн шаардлага нь ил тод болго, нууцаас гарга гэж шударга ёсны зарчмыг шаардаад байгаатай санал нэг.

Иймд Олборлох үйлдвэрлэлийн ил тод байдлын тухай хуулиар уул уурхайтай холбоотой компаниудын цаад ашиг хүртэгч эздийг ил болгох нь чухал байна". Тиймээс энэхүү хуулийн төслийн талаар ХЗДХ-ийн Х.Нямбаатараас тодрууллаа.