АТГ: Хөгжлийн банкны асуудлаар яллагдагчаар татагдсан 94 хүний дотор УИХ-ын гишүүнээр ажиллаж байгаа хүн ч бий

 АТГ-аас өнөөдөр мэдээлэл хийж, нүүрсний хэрэгт холбогдон шалгагдаж буй 17 хүний нэрсийг зарласан. Энэ үеэр манай сэтгүүлч Н.Өнөрцэцэг Хөгжлийн банкны албан тушаалтнуудад холбогдох хэрэг ямар шатанд яваа вэ гэдгийг тодруулахад,  АТГ-ын Мөрдөн шалгах хэлтсийн албаны дарга М.Даваатогтох дараах хариултыг өглөө. 

Тэрбээр "Хөгжлийн банкны албан тушаалтнуудад холбогдох хэрэгт АТГ-аас мөрдөн шалгах ажиллагааг энэ оны нэгдүгээр сарын 28-ны өдрөөс явуулж эхэлсэн.  Мөрдөн шалгах ажиллагаа маш өргөн цар хүрээнд хийгдсэн. Нийт 94 хүн болон хуулийн этгээдийг яллагдагчаар татаж, прокурорын байгууллагад шилжүүлсэн. Үүний дотор УИХ-ын гишүүнээр одоо ажиллаж байгаа, УИХ-ын гишүүн асан ч бий.  Яг өнөөдрийн байдлаар Монгол Улсын Засгийн газраас томилогддог тодорхой албан тушаалтнуудын хэрэг харьяа прокурорын байгууллагад очсон, хянагдаж байгаа. Хөгжлийн банкын хэрэг дээр Монгол Улсын иргэд өргөн дэмжлэг үзүүлсэн, олон нийтийн дэмжлэгтэйгээр энэ хэргийг шуурхай шийдэж чадсан" гэлээ.