"Бодь интернэшнл" ХХК-тай нэг км төмөр замыг 14 тэрбум төгрөгөөр барих НУУЦ гэрээ байгуулжээ

Нүүрсний хулгайг илрүүлэх ажлын хүрээнд  “Эрдэнэс Тавантолгой”-той холбоотой төрийн нууцад хамаарах есөн гэрээг нээлттэй болгосон. 

Үүнд, “Эрдэнэс Тавантолгой” ХК-ийн хэрэгжүүлж байгаа төрийн нууцад хамаарах “Ил уурхайн олборлолтыг үе шаттайгаар нэмэгдүүлэх, шилдэг технологи нэвтрүүлэх төсөл”, “Ил уурхайн аргаар ашиглах боломжгүй нөөцийг далд уурхайн аргаар ашиглаж, экспортыг нэмэгдүүлэх төсөл”, “Загийн усны хоолойн газрын доорх усны ордоос Тавантолгой нүүрсний уурхай хүртэлх ус хангамжийн шугам хоолойн төслийн ажил”, “Богдхан төмөр зам”-ын суурь бүтэц барих төслийн ажил, Тавантолгой-Гашуунсухайт чиглэлийн төмөр замын төслийн ажил болон Тавантолгой-Зүүнбаян чиглэлийн дээд бүтэц дохиолол холбоо, эрчим хүч, гүүр хоолойн барилгын ажил, зураг төсөл гүйцэтгэх ажилд холбогдох есөн гэрээ ил болов. 

Эдгээр НУУЦААС гаргасан гэрээг бид цувралаар танилцуулах бөгөөд эхний ээлжид Тавантолгой-Гашуунсухайт чиглэлийн төмөр замыг барих “Бодь интернейшнл” ХХК-тай байгуулсан гэрээг танилцуулж байна. 

Өмнөговь аймгийн Цогтцэций сумын нутаг дэвсгэрт байрлах Тавантолгойн орд газраас Гашуунсухайт боомт руу төмөр зам тавих бүтээн байгуулалтын зураг төсөл, худалдан авалт, барилгын ажлын санхүүжилтийг гэрээг 2019.10.29-нд байгуулжээ.

Харин нүүрс нийлүүлэх гэрээг 2019.11.13-нд байгуулж, гэрээнд ЭТТ ХК талаас Б.Ганхуяг, “Тавантолгой төмөр зам” ХХК-ийг төлөөлж,  Н.Удаанжаргал, “Бодь интернэйшнл” талаас А.Амундра нар гарын үсэг зурсан байна.  Уг гэрээнд төмөр замын төслийн нийт өртөг нь 1.068 тэрбум ам.доллар, нүүрсний гэрээний дүн нь 682.2 сая ам.долларын гэрээг байгуулсан. 

Тэгвэл дээрх гэрээнд дахин өөрчлөлт оруулж,  2020 оны зургадугаар сарын 10-нд нэмэлт гэрээгээр төмөр замын төслийн нийт дүн 1,282,007,835 ам. доллар гэж нэмэгдүүлж тооцжээ. Мөн нүүрсний гэрээний дүн нь нэмэлт, өөрчлөлтөөр 896.8 сая ам.доллар болгож нэмсэн байна. 

Өөрөөр хэлбэл, төмөр зам барих нийт өртөгийг тухайн үеийн ханшаар /2020 он/ тооцвол 3.6 их наяд төгрөгтэй тэнцэж байна. Эндээс үзвэл, нэг км төмөр замыг 14 тэрбум орчим төгрөгөөр барих нууц гэрээг байгуулсан гэсэн үг. 

САНХҮҮЖИЛТИЙН ХУВААРЬ:

Дараах линкээр гэрээний мэдээлэлтэй танилцана уу.

https://ett.mn/mn/agreement/10...