Х.Нямбаатар: Тавантолгойн бүлэг ордод олборлолт хийсэн талбай дээр он оноор нь хэмжилт хийж эхэлсэн

ХЗДХ-ийн сайд Х.Нямбаатар цаг үеийн асуудлаар мэдээлэл өглөө. 

Тэрбээр "Би та бүхэнд 24 цагийн өмнө мэдээлэл өгсөн. Хэвлэлийн хурлын дараа би гарч жагсагчидай уулзсан. Иргэд нүүрсний гэх хэрэгт холбогдсон этгээдүүдийг зарлаж, бүгдэд нь 15 жилийн хорих ял оноох, хөрөнгийг нь улсын орлого болгох шаардлага тавьж байгаа.  Бид 1992 оны Үндсэн хуульдаа хууль дээдлэх ёсыг төрийн үйл ажиллагааны үндсэн зарчим болгож зарласан. Тиймээс хууль дээдлэх зарчмын дагуу  Эрүүгийн хэрэг хянан шийдвэрлэх ажиллагааг явуулж байж мөрдөн шалгах ажиллагааг явуулж байж нүүрсний хулгайн хэрэгт ямар албан тушаалтнууд холбогдсон бэ гэдгийг шүүхэд шилжүүлж байж олон нийтэд ил болгоно. Жагсагчдын тавьж буй энэхүү шаардлага нь ихэд ойлгомжгүй байгаа юм. 15 жилийн ялыг өнөөдөр хэн хэнд яаж оногдлуулах нь  ойлгомжгүй. Шүүхийн шийдвэрлэх асуудал.

 Мөрдөн шалгах ажиллагааг жагсагчдын шаардлагын дагуу эрчимжүүлсэн. Өмнөговь аймгийн Цогтцэций суманд 40 орчим мөрдөгч ажиллаж, өнөө өглөөнөөс хүмүүсээ дуудаж, асууж тодруулж байгаа. 

Мөрдөн шалгах ажиллагааг явуулахдаа экспортыг зогсоохгүй байх бүх аргыг авч хэрэгжүүлнэ. Тэнд ажиллаж байгаа конторын ажилчид болон экспортод оролцож байгаа Монгол талын компаниудыг дуудаж шалгана. 

Хоёрдугаарт, бид нүүрсийг худалдан авч байгаа талуудыг энэ хэрэгт буруутгаж, шалгахгүй гэдгийг албан ёсоор мэдэгдэж байна. Манай дотоодын тээвэрлэлт, хил гаальтай холбоотой асуудал. 

Мөрдөн шалгах ажиллагаатай холбоотой асуудалд маркшейдэрийн албыг өнөөдрөөс томилсон. Уул уурхайн хэмжилт хийдэг баг бүрэлдэхүүн "Эрдэнэс Тавантолгой  болон жижиг Тавантолгойн олборлолт хийсэн талбай дээр он оноор нь уул ажлын төлөвлөгөөтэй нь уялдуулж, хэмжилт хийнэ. Өөрөөр хэлбэл, нийт хэр хэмжээний талбайд уулын ажлыг хийсэн бэ, хэд нь газрын гадарга дээр хөрс хуулалтын шороо болж  үлдсэн, хэдэн сая тонн нүүрс олборлосон, түүнээс хэд нь коксожсон нүүрс вэ гэдэгт нарийвчлан хэмжилт хийж эхэлсэн. Мөн хил гаалийн мэдээллийг тулгах ажил хийгдэж байгаа" гэлээ.