Сэтгүүлч Н.Өнөрцэцэгийн “Төсвийг мөшгөе” нэвтрүүлэг оны шилдэг бүтээл боллоо

"Зариг.мн" сайтын эрхлэгч, сэтгүүлч Н.Өнөрцэцэг “Төсвийг мөшгөе” эрэн сурвалжлах нэвтрүүлгээрээ “Ган үзэг 2022” сэтгүүл зүйн салбарын оны тэргүүн наадмын “Мэдээллийн сайтын оны шилдэг бүтээл”-ийн эзэн боллоо. Н.Өнөрцэцэг нь 2022 оны нэгдүгээр сараас хойш Хөгжлийн банкны чанаргүй зээлийн асуудлыг “Төсвийг мөшгөе” эрэн сурвалжлах нэвтрүүлгээрээ хөндөн, нийгэмд шүгэл үлээж өнөөдрийг хүртэл тус банкны зээлийн эргэн төлөлтийн талаар цуврал мэдээ, сурвалжилга бэлтгэсээр буй. Түүний бэлтгэсэн олон удаагийн цуврал мэдээ, сурвалжлагын үр дүнд  Хөгжлийн банкны зээлийн эргэн төлөлт сайжирч өнөөдрийн байдлаар 803.7 тэрбум төгрөгт хүрч,  энэ хэмжээгээр төсөвт хувь нэмрээ оруулаад байна.

 “Чингис” бондын эцсийн төлбөр болох 136 сая ам.долларыг өчигдөр (2022.12.05) төлж, бүрэн барагдуулж дууссан нь “Төсвийг мөшгөе” нэвтрүүлгийн үр дүн гэж хэлж болно.

Н.Өнөрцэцэгийн бэлтгэн хүргэдэг “Төсвийг мөшгөе” эрэн сурвалжлах нэвтрүүлэг нь татвар төлөгчдийн мөнгийг төсвөөр дамжуулан хаана, хэн зориулалтын бусаар ашиглаж байна вэ гэдгийг баримттайгаар хөнддөг эрэн сурвалжлах нэвтрүүлэг юм. “Төсвийг мөшгөе” эрэн сурвалжлах нэвтрүүлэг 2022 онд зөвхөн “Хөгжлийн банк”-ны өрийн асуудлаас гадна “Ковид”-ын үед төсвийн мөнгөөр нэг ширхэг маскийг 20 мянган төгрөгөөр худалдан авсан, Малын вакциныг 3 дахин өндөр үнээр авч зөрүүг нь дарга нар хувийн дансаараа авдаг зэрэг төсвийн хулгайг баримттайгаар ил болгож байсан юм.