У.Цогтбаяр: Мөнгөө авъя ах аа, ард түмнээ хүндлэл дээ

Ерөнхий сайд Л.Оюун-Эрдэнэ:  Үг хэлэх, жагсаж цуглах эрхээ эдэлж байгаа та бүхэндээ талархаж байна. Манай улсын эдийн засгийн дийлэнх хүчийг уул уурхайн салбар бүрдүүлдэг.  Тиймээс нүүрстэй холбоотой, зэсийн орд газруудтай холбоотой улстөрчид, хууль хяналтын байгууллага, шүүх зэрэг олон хүмүүсийн бүлэглэл амь бөхтэй оршсоор байна. Энэ асуудалтай Монгол Улсын Засгийн газар тэмцсээр ирсэн. Бүлэглэлтэй хийх тэмцэл тийм амар байгаагүй.  Одоо бид шийдвэрлэх үедээ ажиллаж байна, энэ бол нүүрсний хулгай. Засгийн газар Тавантолгой компанид онцгой дэглэм тогтоогоод 14 хонож байна. Засгийн газрын өнөөдрийн хуралдаанаар 14 хоногийн ажлын үр дүнг авч хэлэлцсэн. Олон асуудлыг илчилж, гарган тавьж байгаа. Тийм учраас нүүрсний хулгайн асуудал Оюутолгой, Хөгжлийн банк, Эрдэнэт үйлдвэрийн 49 хувьтай адилхан шийдэгдэж, үр дүнд хүрнэ. Тавантолгой компанийн захиалгаар залуусын жагсаалыг эмх замбараагүй байдалд уриалан дуудаж байгаа хэсэг бүлэг бий. Иргэд маань ялгаж салгаж хандана гэдэгт итгэж байна. Нүүрсний хулгайтай холбоотой асуудлыг Монгол Улсын Засгийн газар илрүүлэхийн төлөө тэмцэх болно. Ард түмэн та бүхэн бидэнтэй хамт байна гэдэгт итгэж байна.

Жүжигчин У.Цогтбаяр: Нүүрсний хулгайч нарын 40 их наяд төгрөгийг улсын төсөвт авъя ах аа. Мөнгөө авъя. Шаардлагатай бол зарлана гэсэн, та хэзээ зарлах юм бэ. Хэдэн жилийн хулгай юм бэ.  Таныг таван жил хүлээлээ. Та Ерөнхийлөгч У.Хүрэлсүх, генсекээс битгий айгаач. МАН-ын санхүүтэй холбоотой хүмүүсээс битгий айгаач. Битгий ерөнхий байгаач ээ, ард түмнээ хүндлэл дээ.