​Замын хөдөлгөөний аюулгүй байдлын төлөө хамтдаа зөвлөгөөн Дархан-Уул аймагт болж байна

Зөвлөгөөнд Дархан-Уул, Орхон, Төв, Сэлэнгэ аймгуудын Тээврийн цагдаагийн алба, Замын цагдаагийн тасаг, прокурор, орон нутгийн төр захиргааны байгууллагын удирдлагууд болон төрийн бус байгууллагын 30 гаруй төлөөлөл оролцож байна.
Монгол улсын хэмжээнд он гарсаар 10 сарын байдлаар зам тээврийн осол аваараас шалтгаалан нас барсан хүний тоо 477 бүртгэгдсэн байна. Үүний 401 нь орон нутгийн замын осол байгаагийн 29.9 хувь нь төвийн бүсийн замд бүртгэгджээ.
Дархан-Уул аймгийн хэмжээд он гарсаар согтуугаар тээврийн хэрэгсэл жолоодсон зөрчил 1730 бүртгэгдсэн нь өндөр үзүүлэлт юм. Харин Орхон аймагт зам тээврийн осол гэмтэл өмнөх оны мөн үеэс 40 хувиар буурсан ч бага насны хүүхэд замын осолд өртсөн үзүүлэлт өссөн байна.
Тиймээс зам тээврийн осол аваарыг бууруулах чиглэлд цаашид авч хэрэгжүүлэх үйл ажиллагаа, гарц шийдлийг зөвлөгөөнд оролцогчид хэлэлцэж байна. Аймаг орон нутгийн Гэмт хэргээс урьдчилан сэргийлэх салбар зөвлөлөөр дамжуулан энэ асуудалд анхаарах, олон нийтийг соён гэгээрүүлэх чиглэлд ажил арга хэмжээг улам эрчимжүүлэх, салбар дундын хамтын ажиллагааг сайжруулах шаардлагатайг албаныхан онцолж байна. Зөвлөгөөний төгсгөлд нэгдсэн зөвлөмжийг гаргах юм.