Шүүхээс 13 настай охиныг 58 удаа хутгалж амь насыг хохироосон хэрэгт 11 настай хүүг гэм буруутайд тооцож, насанд хүрээгүй үндэслэлээр хэргийг хэрэгсэхгүй болголоо

13 настай охиныг хутгалж хөнөөсөн 11 настай хүүгийн гэм буруугийн шүүх хурал өчигдөр боллоо. Хэргийг тодруулбал, өнгөрсөн 2021 оны наймдугаар сарын 7-нд БЗД-ийн нутаг дэвсгэрт байрлах ... хорооллын автомашины зогсоолд 11 настай хүүхэд өөрийн төрөл садангийн холбоотой 13 настай охин, 7 настай хүүг хутгалсан ноцтой гэмт хэрэг гарсан. Хэргийн улмаас 13 настай охин шархаа даалгүй газар дээрээ амиа алдсан ба түүний дүү болох 7 настай хүү хүнд гэмтэж эрүүл мэндийн байгууллагад хүргэгдэж байв. 

Хэргийг үйлдсэн гэх 11 настай хүү өөрийгөө ийм гэмт хэрэг үйлдээгүй гэж мэдүүлж буй бөгөөд түүний ар гэр цагаатгуулах хүсэлтэйгээр прокурорт гомдол гаргасан байдаг. Шүүх эл гомдлыг хэлэлцэж үзээд 11 настай хүүг гэм буруутайд тооцлоо. Гэвч тухайн хүү нь 11 настай буюу Эрүүгийн хуулийн тусгай ангид заасанчлан гэмт хэрэгт хариуцлага хүлээх субъект болохгүй тул шүүхээс шүүгдэгч ял оногдуулах насанд хүрээгүй гэх үндэслэлээр хэргийг хэрэгсэхгүй болгон шийдвэрлэжээ.