Хөгжлийн банкны чанаргүй зээлдэгч "Монгол драй милк" ХХК-ийн шүүх хурал 15 дахь удаагаа хойшлогдов

Хөгжлийн банканд 2022 оны нэгдүгээр сарын 20-ны өдрөөс хойш арваннэгдүгээр сарын 15-ны өдрийг хүртэлх хугацаанд нийт 784.2 тэрбум төгрөгийн зээлийн эргэн төлөлтийг хийсэн. Үүнээс 696.3 тэрбум төгрөг бэлэн мөнгөөр, 87.9 тэрбум төгрөг нь өмчлөх бусад үл хөдлөх хөрөнгөөр эргэн төлөгдсөн байна.

Хөгжлийн банкны зээлийн  хэрэгт 83 хүн яллагдагчаар татагдан, шалгагдаж буй. 

Тухайлбал, шүүхэд нэхэмжлэл гаргасан чанаргүй зээлдэгчийн нэг  нь “Алтай констракшн” ХХК-ийн захирал Х.Бат-Эрдэнийн хамаарал бүхийн "Монгол драй милк" ХХК юм. Тус компани хөдөө орон нутгуудад 60 ширхэг хуурай сүүний үйлдвэр байгуулж дотоодын зах зээлийг хуурай сүүгээр бүрэн хангаж,  гадаад руу экспортлох төслөөрөө Хөгжлийн банкнаас 15 сая ам.доллар буюу 47 тэрбум төгрөгийн зээл авч байв. 

Тэгвэл тус компанитай холбоотой шүүх хурал өнөөдөр /2022.11.21/ товлогдсон боловч дахин хойшилжээ. Ингэснээр 2019 оноос хойш шүүх хурал нь нийтдээ 15 удаа хойшилж байна. 

 "Монгол драй милк" ХХК  зээлийн барьцаа болох хамаарал бүхий аж ахуйн нэгжүүдийн хөрөнгө нь 47 тэрбум төгрөгийнхөө 10 хувьд ч хүрэхгүй үнийн дүнтэй байснаас гадна сүүний үйлдвэр байгуулаагүй буюу зээлийг зориулалт бусаар ашигласан учир 2019 оны есдүгээр сарын 23-нд шүүхэд шилжүүлсэн байдаг. 

Өнгөрсөн хугацаанд чанаргүй зээлдэгчдийг зарласнаас хойш "Монгол драй милк" ХХК 47 тэрбум төгрөгийн зээлнийхээ 1.2 тэрбум төгрөгийг төлсөн байна.

Сануулахад,  "Алтай констракшн" компанийн захирал  Х.Бат-Эрдэнийн шүүх хурал энэ оны хоёрдугаар сарын 23-ны өдөр болж, шүүх хурлаар "Алтай констракшн" компанийн захирал  Х.Бат-Эрдэнийг "гэмт хэрэг үйлдэж болзошгүй талаар баримт байгаа" гэх үндэслэлээр тус өдрөөс эхлэн 30 хоног цагдан хорих шийдвэр гаргаж байсан билээ.