Д.Амарбаясгалан: Л.Оюун-Эрдэнэ бид хоёр эрх мэдлийн төлөө тэмцэлдэх ямар ч учир шалтгаан байхгүй

Засгийн газрын хэрэг эрхлэх газрын /ЗГХЭГ/ дарга Д.Амарбаясгалан сэтгүүлчдийн асуултад хариуллаа. Тэрбээр өөрийг нь Ерөнхий сайдын оронд томилогдох гэж байна гэх асуултад дараах мэдээллийг өглөө.

Засгийн газрын хэрэг эрхлэх газрын дарга Д.Амарбаясгалан: Эрх мэдэлтэй , эд хөрөнгөтэй хүмүүсийн эрх ашиг газар бүрт хөндөгддөг байх. Гэхдээ ийм байдлаар төрд үнэнчээр, ард иргэдийнхээ төлөө зүтгэж буй улс төрчид болон тодорхой албан тушаалтнуудад дарамт шахалт үзүүлдэг байсан нь надад ч  мөн мэдрэгдэж байгаа. Жишээ нь, Л.Оюун-Эрдэнэ, Д.Амарбаясгалан хоорондоо хагарсан, Л.Оюун-Эрдэнийг Ерөнхий сайдын суудлааас унагааж, Д.Амарбаясгалан өөрөө Ерөнхий сайд болно гэх зүйлийг зориуд зохион байгуулалттайгаар хийж байна. Дэлхийн эдийн засгийн хямралаас үүдэлтэйгээр улс оронд учирч байгаа эрсдэл, дарамтыг амь нэгтэй  даван туулах нь бидний зорилго шүү дээ. Манай намын дарга Л.Оюун-Эрдэнэ болон миний бие хоорондоо эрх мэдлийн төлөө тэмцэлдэх ямар ч учир шалтгаан байхгүй. Харин энэ нам ард түмнээс өгсөн үүрэг, даалгаврыг ухамсарлаж, нийгэмд болохгүй байгаа завхрал, авлигаас ангид байхын тулд тэмцэх ёстой.