Х.Нямбаатар: Хамтарсан баг төсөв санхүүжилтгүйгээр гэр бүлийн хүчирхийлэлтэй тэмцэж байна

“ГЭР БҮЛИЙН ХҮЧИРХИЙЛЭЛТЭЙ ТЭМЦЭХЭД ОЛОН ТАЛТ ХАМТЫН АЖИЛЛАГАА” хамтарсан багийн үндэсний V чуулган төрийн ордонд үргэлжилж байна.

Чуулганд гэр бүлийн хүчирхийллээс урьдчилан сэргийлэх, хүчирхийллийн болзошгүй эрсдэлтэй гэр бүлийг илрүүлэх, хүчирхийллийн хохирогчид үйлчилгээ үзүүлэх, хамгаалах чиг үүрэг бүхий улсын хэмжээнд үйл ажиллагаа явуулж буй 735 хамтарсан багийн 800 гаруй төлөөлөгчид оролцож байгаа юм. 

Дээрх хамтарсан багуудын чадавхыг улам бэхжүүлэх, гишүүдийн ажлын хуваарийг тодорхой болгож, энэ хүрээнд үйл ажиллагааны санхүүжилтийг шийдвэрлэх гээд олон асуудлыг хэлэлцэж байгаа бөгөөд Хууль зүй, дотоод хэргийн сайд Х.Нямбаатар сэтгүүлчдэд мэдээлэл өглөө. 

Тэрбээр "2021 онд Хууль зүй, дотоод хэргийн яамны төсвөөс 360 сая төгрөгийг хамтарсан багт шилжүүлж хамтарсан багууд эрсдэлтэй айлуудаар явж, суурь судалгаа хийх шатахууных нь зардлыг шийдэж өгсөн.  Хамтарсан багийг тусдаа төсөвтэй, урсгал зардалтай болгож байж гэмт хэргээс урьдчилан сэргийлж чадна. Гэр бүлийн хүчирхийллийг заавал зөрчлийн дуудлага мэдээллээр таслах зогсоох бус соён гэгээрүүлэх чиг үүргээр цаашид ажиллах зорилгыг тодорхойлж байна. Ирэх оны төсөвт гэр бүлийн хүчирхийлэлтэй тэмцэх хуулийг батлахдаа хамтарсан багийн чиг үүргийг зааж өгснөөс биш төсөв санхүүг нь шийдэж өгөөгүй" хэмээсэн юм.