Шүүхээс Э.Одбаяр нарт харьяа дүүргээсээ 1-1,2 жилийн хугацаанд гарахгүй байх, зорчих эрхийг хязгаарлах ял оноолоо

Баянгол дүүргийн Эрүүгийн хэргийн анхан шатны шүүхэд өнөөдөр /2022.11.08/ "No War" хөдөлгөөнийг зохион байгуулсан Э.Одбаяр, Ц.Чинбат, Б.Билгүүн, Л.Ганхөлөг нарын таван хүнд холбогдох эрүүгийн хэргийн гэм буруугийн шүүх хурал боллоо. 

Прокуророос шүүгдэгч Ц.Чинбатыг 1 жилийн хорих ялаар, Б.Билгүүнийг 8 сар, Б.Бямбагэрэлд 2 жилийн хугацаагаар БЗД-ээс гарахгүйгээр зорчих хэсгийг хязгаарлах, Э.Одбаярыг 1 жил 9 сараар хорих, Л.Ганхөлөгийг 8 сараар ял эдлүүлэх саналыг хүргүүлээд байсан. 

Тэгвэл шүүх бүрэлдэхүүн шийдвэрээ гаргаж, Э.Одбаярт 1,2 жил, бусад шүүгдэгч нарт 1 жил суугаа/харьяа дүүргээсээ гарахгүй байх ял оноосон байна. Тэд давж заалдана гэж мэдээллээ. 

Тэднийг "Эрүүгийн хууль-"ийн 13.14, 23.1.1-д заасан гэм буруутайд тооцсон байна. 

13.14 дүгээр зүйл. Худал мэдээлэл тараах

• 1.Хүний нэр төр, алдар хүнд, хуулийн этгээдийн ажил хэргийн нэр хүндэд халдсан илт худал мэдээллийг олон нийтэд тараасан бол дөрвөн зуун тавин нэгжээс нэг мянга гурван зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ.

23.1 дүгээр зүйл. Хууль сахиулагчийг эсэргүүцэх

• 1.Хууль сахиулагчийг албан үүргээ биелүүлэхтэй нь холбогдуулан хүч хэрэглэсэн, хүч хэрэглэхээр заналхийлж эсэргүүцсэн бол хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ" гэж заажээ.