12-р ангийн сурагчид нулимс асгаруулагчийг их завсарлагааны үеэр цацсан байж болзошгүй байна

Дархан-Уул аймаг, Дархан сум "9-р баг Оюуны ирээдүй сургуулийн А байранд газ алдсан юм шиг байна" гэсэн мэдээлэл 11-р сарын 08-ны 11:05-д цагдаагийн байгууллагад иржээ.

 Тус сургуулийн 12 дугаар ангийн хоёр сурагч БНХАУ-д үйлдвэрлэсэн байж болзошгүй хаяг шошготой харуул хамгаалалтын зориулалт бүхий нулимс асгаруулагч гэх цацлага их завсарлагааны үеэр нэг давхарын цайны газрын кордиорт нэг удаа цацсан байж болзошгүй байдал нь камерийн бичлэгт бичигдсэн байна. Мөн эд мөрийн баримтыг хогийн саванд хаяснаа сурагчид өөрсдөө хэлсэн гэх зэргээр урьдчилсан байдлаар дээрх нөхцөл байдал илэрчээ. Уг хэргийг Цагдаагийн байгууллагаас үргэлжлүүлэн шалгаж байгаа юм байна.

ЭМЯ-наас бидэнд өгсөн мэдээллээр хордсон байж болзошгүй багш, сурагчдыг Дархан-Уул аймгийн нэгдсэн эмнэлэгт хүргэж, яаралтай тусламж үзүүлэн ажиллаж байгаа аж. Сургуулийн сургалтын үйл ажиллагааг зогсоож, мэргэжлийн байгууллагууд ямар бодис цацагдсаныг аймгийн ОБГ-аас тодруулахаар ажиллаж байгаа юм байна. Эмнэлэгт очсон сурагчид болон багш ажилтнуудад хордлого тайлах эмчилгээ хийж байгаа бөгөөд 58 хүүхэд зургаан том хүн эмнэлэгт хүргэгджээ. Хоёр иргэний биеийн байдал анх эмнэлэгт хүргэгдэхэд тааруу байсан бол эмнэлгийн анхан шатны тусламж авч тогтворжиж эхэлсэн гэх мэдээллийг ЭМЯ-наас мэдээллээ. Хүүхдүүдийн  биеийн байдал тогтвортой байгаа аж.