“Цахим шилжилтийг хэрэгжүүлэхэд төрийн байгууллагуудын хамтын ажиллагаа” зөвлөлдөх уулзалт боллоо

Цахим хөгжил, харилцаа холбооны сайд Н.Учралын санаачилгаар “Цахим шилжилтийг хэрэгжүүлэхэд төрийн байгууллагуудын хамтын ажиллагаа” зөвлөлдөх уулзалтыг зохион байгуулж байна. Уулзалтын гол зорилго нь төрийн үйл ажиллагааг цахимжуулах, цахим шилжилтийн талаар төрийн байгууллагуудын хамтын ажиллагааг бий болгож, салбар бүрээс танилцуулах илтгэлийн хүрээнд тулгамдаж буй асуудлуудыг хамтран шийдвэрлэх шийдлийг эрэлхийлэхэд оршиж байгаа аж. 

Уулзалтын эхэнд Цахим хөгжил, харилцаа холбооны сайд Н.Учрал яамнаас хэрэгжүүлж буй бодлого шийдвэр, өнөөгийн нөхцөл байдал, тулгамдаж буй асуудал, гарц шийдлийн талаар илтгэл тавьсан юм. Энэ хүрээнд дүрэм журмын саад тээгийг арилгах, Төрийн үйлчилгээг операторын горимд шилжүүлэх, салбаруудын цахим шилжилтэд тулгамдаж буй асуудлуудыг хамтран шийдэх, E-Business систем нэвтрүүлэх, Mindgolia буюу програм хангамжийн цахим дэлгүүрийг бий болгох, Үндэсний клауд дэд бүтцийг бий болгох, Төрийн байгууллагуудын ERP ашиглалтыг сайжруулах, албан бичиг солилцооны дундын систем нэвтрүүлэх, Төрийн албанд Мэдээллийн технологийн чиглэлийн чадварлаг хүний нөөц тогтвортой ажиллах боломжийг бий болгох, Ухаалаг аймаг, хотын стандартыг нэвтрүүлэх ажлуудыг танилцууллаа.

Энэхүү уулзалтад төрийн 75 байгууллагын 160 гаруй албан хаагч оролцож байна. Тэд салбарынхаа цахим шилжилтийн бодлого, төлөвлөгөөний хэрэгжилт, тулгамдаж байгаа асуудлуудаа танилцуулж, ЦХХХЯ-тай хамтарч ажиллах талаар хэлэлцэх юм.