УИХ: Улсын хэмжээнд гэр хорооллын айл өрхийг шөнийн тарифын хөнгөлөлтөд хамруулна

2023 оны төсвийн төслөөс Засгийн газрын 2017 оны 199 дүгээр тогтоолоор баталсан “Гэр хорооллын айл өрхөд цахилгаан эрчим хүчний тарифын хөнгөлөлт үзүүлэх” журмын дагуу 10 мянгаас дээш хүн амтай сум, суурин газрын гэр хорооллын айл өрхөд олгодог шөнийн тарифын хөнгөлөлтийг хасаад байсан юм. 

Улмаар төсвийн хэлэлцүүлгийн шатанд УИХ-ын гишүүн М.Оюунчимэг дээрх асуудлыг хөндөж, эдийн засаг хүндрэлтэй энэ үед гэрийн хорооллын өрхүүдэд шөнийн цахилгааны тарифын хөнгөлөлтийг үргэжлүүлэх шаардлагатай гэдгийг хөндсөн. Улмаар энэ Даваа гаригт УИХ дахь МАН-ын бүлгийн хуралдаанаар дээрх хөнгөлөлтийг зөвхөн нийслэлийн айл өрхөд хэрэгжүүлэхийг дэмжиж, шаардагдах 18.8 тэрбум төгрөгийг төсөвт суулгахаар дэмжсэн.

Тэгвэл УИХ-ын Төсвийн байнгын хорооноос нэгтгэн гаргасан зарчмын зөрүүтэй саналд улсын хэмжээнд гэр хорооллын айл өрхөд цахилгаан эрчим хүчний тарифын хөнгөлөлтийн зардалд шаардагдах 33 тэрбум 628 сая төгрөгийг Эрчим хүчний сайдын урсгал зардалд нэмэх саналыг УИХ-ын чуулганаар санал хураахад, гишүүдийн олонх нь дэмжлээ.  Ингэснээр ирэх жил гэр хорооллын айл өрхийн шөнийн тарифын хөнгөлөлтийг үргэлжлүүлэх нөхцөл бүрдэв. 

Хөнгөлөлтийн хамрах хүрээ:

• Аймаг нийслэлийн болон 10 мянгаас дээш хүн амтай сум, суурин газрын гэр хорооллын бүсэд орших хоёр тарифт тоолууртай өрхийн орой, шөнийн цагт хэрэглэсэн цахилгааны тариф болон сэргээгдэх эрчим хүчийг дэмжих тарифыг хөнгөлнө.