"Ц.Даваасүрэн гишүүнээ бусад гишүүд рүүгээ дайрч доромжилдог, ганцаарчилсан улс төр цаг үеэ өнгөрөөсөн шүү"

УИХ-ын чуулганы өчигдрийн хуралдааны үеэр УИХ-ын гишүүн Ц.Даваасүрэн " Хөгжлийн банкны асуудалтай холбоотойгоор УИХ-ын гишүүн Г.Амартүвшинд хандан "Чи УИХ-аас татгалзаад шалгуулна гэсэн яасан бэ? Шалгуулаарай чи. Чамд УИХ-д суух эрх байхгүй шүү" гэсэн юм. 

Тэгвэл өнөөдрийн чуулганы хэлэлцэх асуудлын өмнө УИХ-ын гишүүн Г.Амартүвшин "Өнөөдөр чуулганы хуралдаанаар Хөгжлийн банктай холбоотой Ерөнхий сайдын мэдээллийг сонсоно. Чухал мэдээлэл болно гэж харж байгаа.  Харамсалтай нь өчигдөр чуулганы танхимд Ц.Даваасүрэн гишүүн намайг үндэслэлгүй гүтгэж, дайрч, ёс зүйгүй мэдээлэл хийсэн. Иймээс би өөрийнхөө тайлбарыг хийе. Надтай холбож яриад байгаа 33 тэрбум төгрөгийн зээл надад хамаагүй. Би Хөгжлийн банкны зээлчдэгчтэй хамааралтай байгаагүй. Энэ зээл төлөгдсөн гэдгийг тус компани мэдээлэл хийсэн. Би өөрийгөө шалгуулж байгаа. Надтай холбоотой мэдээллийн үнэн зөв нь удахгүй ил болно. Боломжтой компаниуд Хөгжлийн зээлээ төлөөд дуусчихсан. Одоо төрийн өмчийн компаниуд болон Эрчим хүчний салбартай холбоотой зээлүүд үлдсэн байна. Ц.Даваасүрэн гишүүний шүүмжлээд байгаа нь тогтоолын төсөл нь 2023 онд Засгийн газар Хөгжлийн банкны бондыг дахин санхүүжүүлэхийн тулд шаардлагатай тохиолдолд баталгаа гаргана гэсэн тогтоол байгаа юм. Энэ тогтоолыг дэмжсэн гишүүд рүү дайраад байгаа юм. 

 Та бол олон жил парламентад сууж байгаа гишүүн, энэ утгаараа залуу гишүүддээ үлгэрлэл болох ёстой.  Залуу гишүүд өөрөөс чинь үлгэр дуурайлал хайдаг шүү, энэ танхимд.  Бусад гишүүд рүүгээ дайрч доромжилж, ганцаарчилсан улс төр цаг үеэ өнгөрөөсөн шүү. Нөгөөтэйгүүр Ц.Даваасүрэн гишүүнд баярлалаа, миний PR-ийг чуулганы индэр дээрээс сайн хийж өгсөнд тань баярлалаа. Танд амжилт хүсье " гэлээ.