Г.Эрдэнэбилэг: Бид тоглолтоо хийсэн нь Солонгос улсын хуулийг зөрчөөгүй

"Тоонот" студийн залуус энэ сарын 29, 30-ны өдрүүдэд БНСУ-ын Сөүл хотод тоглолтоо хийхээр төлөвлөөд байсан билээ. Тоглолт эхний өдрөө хуваарь ёсоор тоглогдсон. 

Энэ сарын 29-нөөс 30-нд шилжих шөнө Сөүл хотын Юнсан дүүргийн Итэвон хороонд хэт олон хүн цугларснаас үүдэлтэй ослоос шалтгаалан олон хүний эрдэнэт амь эрсэдсэн эмгэнэлт явдал болсон. 

Уг үйл явдалтай холбоотойгоор тэд хоёр дахь өдрийн тоглолтоо үргэлжлүүлэн хийх эсэх дээр "Тоонот"-ынхон хоорондоо ярилцаж холбогдох албаныханаас тодруулахад "Хууль зөрчих үйлдэл болохгүй" гэдгийг тэдэнд хэлсэн байна. 

Тиймээс хуваарь ёсоор тэд тоглолтоо хийсэнд Монголчуудын зүгээс шүүмжлэлтэй хандаж байгаа учир дуучин Г.Эрдэнэбилэг үүнд тайлбар хийжээ. Тэрбээр "Бид тус улсын хуулийг зөрчөөгүй. Хэдийгээр харамсалтай үйл явдал болж бүх нийтээр гашуудал зарласан ч онцгой байдал биш гэдгийг хэлье. Тус улсаас биднийг буруутгахгүй гэдэгт итгэж байна. Монголчууд маань л шүүмжлэлттэй хандаж байна. Бид Пусанд явж байхдаа хүүхдээ эмчлүүлэх гээд ирсэн ч очих газаргүй гудамжаар хоног төөрүүлж яваа Монгол эмэгтэйтэй таарсан. Тоглолтын эхний өдрөө бид тухайн эмэгтэйн бодит байдлыг үзэгчдэд танилцуулж олон хүн тус  хүргэхээр болсон. Харин хоёр дахь өдрийн тоглолтын орлогоо тухайн эмэгтэйд өгөхөөр болсон. Бид нэгнээ хайрладаг байя" гэж видео бичлэгтээ дурджээ.