Г.Занданшатар: Энэхүү эмгэнэлт цаг үед Монгол Улс БНСУ-тай хамт байх болно

Монгол Улсын Их Хурлын дарга Г.Занданшатар Өмнөд Солонгосын нийслэл Сөүл хотын Итэвон дүүрэгт болсон эмгэнэлт ослоор 151 хүн амь үрэгдэж, олон хүн гэмтэж бэртсэнд эмгэнэл илэрхийллээ. Тэрбээр "Монгол Улсынхаа нэрийн өмнөөс болон хувиасаа БНСУ-ын ард түмэнд, нас барсан хүмүүсийн ар гэрийнхэнд гүн эмгэнэл илэрхийлж байна. Энэ үед гэмтэж эмнэлэгт хүргэгдсэн олон хүмүүсийг хурдан эдгэрэхийг хүсч байна. Энэхүү эмгэнэлт цаг үед Монгол Улс БНСУ-тай хамт байх болно" гэжээ.

Өмнөд Солонгос улсын нийслэл Сөүл хотын Юнсан дүүргийн Итэвон хороонд аравдугаар сарын 29-нөөс 30-нд шилжих шөнө болсон ослын улмаас одоогийн байдлаар 151 хүн нас барж, 82 хүн гэмтсэн харамсалтай үйл явдал болоод байна. Тус улсын холбогдох төрийн байгууллагууд ослын шалтгаан, нас барагсдын хувийн байдлыг тогтоохоор ажиллаж байна.

Тэгвэл өнөө өглөөний 09:55 цагийн байдлаар нас барсан хүмүүсийн дунд Монгол Улсын иргэн байхгүй гэж Сөүлийн цагдаагийн газраас Өмнөд Солонгос улсад суугаа Монгол Улсын Элчин сайдын яаманд мэдэгджээ.