Б.Ганхуягийг ажлаас нь чөлөөлж, тамга тэмдгийг хураан авлаа

Засгийн газрын ээлжит хуралдаанаар өнөөдөр /2022.10.26/ “Эрдэнэс Тавантолгой” ХК-д  зургаан сарын хугацаагаар онцгой дэглэм тогтоох шийдвэрийг гаргасан. Тодруулбал, төлбөрийн тэнцлийн алдагдал өндөр байгаа өнөөгийн нөхцөлд гадаад валютын орох урсгалыг нэмэгдүүлэх зорилгоор дээрх арга хэмжээг авсан. 

 Тус компанийг бүрэн төлөөлөх эрх бүхий Засгийн газрын онцгой бүрэн эрхт төлөөлөгч Сангийн яамны Төрийн нарийн бичгийн дарга Ж.Ганбат дөнгөж сая “Эрдэнэс Тавантолгой” ХК-д ажиллаж,  гүйцэтгэх захирлаар ажиллаж байсан Б.Ганхуягийг ажлаас чөлөөлж, тамга тэмдгийг нь хураан авлаа. 

Б.Ганхуягийн хувьд "Засгийн газрын тогтоолыг дэмжиж байгаагаа илэрхийлж,  ажлын хэсгийн дарга, бүрэн эрхт төлөөлөгч, гишүүдтэй бүх түвшинд хамтран ажиллана. Гол нь бүх тоон зөрүүтэй мэдээлэл арилж, нэг тоо, нэгдсэн мэдээлэлтэй болно" хэмээн байр сууриа илэрхийлсэн.

 “Эрдэнэс Тавантолгой” ХК-д тогтоосон онцгой дэглэмийн хугацаанд компанийн үндсэн үйл ажиллагаа, удирдлага, зохион байгуулалт, төлбөр тооцоог сайжруулж, орлогыг нэмэгдүүлэх асуудлыг шууд хариуцан гүйцэтгэх юм.