Ц.Анандбазар: Намайг гүтгэсэн хүнд ял оноосон, үнэн мөнийг тогтоосон шүүхийн байгууллагад талархаж байна

Охид эмэгтэйчүүдэд бэлгийн дарамт үзүүлдэг байсан гэх хэрэгт өнгөрсөн оны  дөрөвдүгээр сараас эхлэн нэр холбогдсон УИХ-ын гишүүн Ц.Анандбазартай холбоотой хэргийг Нийслэлийн прокурорын газраас хэрэгсэхгүй болгожээ.

Энэ талаар түүнээс тодруулахад тэрбээр " Хэрэгсэхгүй болгосон нь үнэн. Уг нь аль эрт л хэрэгсэхгүй болох байсан юм. Энэ бол зохион байгуулалттай, олон хүний оролцоотой, олон тэрбум төгрөгийн захиалгатай ийм гүтгэлэг байсан. Монголын ард түмэн итгэж байсан. "Үнэнээр явбал үхэр тэргээр туулай гүйцдэг" гэдгийг харууллаа. Хүн гүтгэнэ гэдэг бол хамгийн том нүгэл. Дэндүү их намайг гүтгэсэн нь хуурамч шатахууныг эсэргүүцсэнэй  холбоотой. Монголын ард түмний автомашиныг хамгаалсныхаа төлөө би өнгөрсөн хугацаанд нүдүүллээ. Намайг гүтгэсэн хүн шүүхээс хоёр жилийн тэнсэн авсан гэж сонссон. Өнөөдөр хүмүүсийн амьдрал хэцүү байна, аав ээжийнх нь бие муу байхад нь ашигласан юм билээ. Үнэн, мөнийг нь зөвөөр тогтоож өгсөн шүүхийн байгууллагад талархаж байна" гэлээ.